Серик Конакбаев Ғофур Раҳимов билан AIBA президентлиги учун кураш олиб боради

Қозоғистонлик собиқ таниқли боксчи Серик Конакбаев халқаро ҳаваскорлар бокс федерацияси (АИБА) раҳбарлигига номзодлар қаторидан жой олди.

Бунгача ушбу лавозимга фақатгина ўзбекистонлик Ғофур Раҳимов асосий даъвогар бўлиб турган эди. У жорий йил январидан АИБА раҳбарлиги лавозимин вақтинчалик бажарувчи сифатида ишлаб келмоқда. Олдинги раҳбарият кўплаб қоидадан ташқари ишларда айблангани сабабли истеъфога чиқарилган эди.

AIBA президентлигига сайловлар 3 ноябр кунги ташкилотнинг Москвадаги конгрессида бўлиб ўтади. Россия бокс федерацияси бош котиби Умар Кремлевнинг сўзларига кўра, овоз бериш жараёнида иштирок этадиган кўплаб миллий федерациялар вакиллари Раҳимов номзодини қўллаб-қувватламоқда.

Шу ўринда халқаро Олимпия қўмитаси АИБАга бошқарув, молия ва антидопинг бўйича масалаларда эътироз билдиришда давом этмоқда. Шу сабаб бокс кейинги Олимпия ўйинлари дастурига киритилмаслиги мумкин. Шунингдек, ХОҚ АИБА президенти Ғофур Раҳимов бўлишига норозилиги билдирган.