Тошкент Гран-Присида бугун баҳсларга киришадиган спортчиларимиз билан танишинг
Бугун Тошкент шаҳри мезбонлик қилаётган дзюдо бўйича Гран-При халқаро турнирининг иккинчи кунги беллашувлари бўлиб ўтади.
Кечаги мусобақалардан сўнг терма жамоамиз аъзолари 2 бронза медалини кўлга киритишди. Булар 60 кг вазн тоифасида юртимиз шарафини ҳимоя қилган Шарофиддин Лутфуллаев ва 66 кгда кураш олиб борган Сардор Нуриллаев.
Иккинчи кунги қарама-қаршиликларда аёллар ўртасида 63 кг ва 70 кг вазнли спортчилар ғолиблик учун кураш олиб борсалар, эркаклар ўртасида 73 кг ва 81 кг вазнли спортчилар беллашадилар.
73 кг вазн тоифасида эркаклар ўртасидаги қарама-қаршиликларда жорий йил бошида Тбилиси (Грузия)да ўтган Гран-При турнирида олтин медални қўлга киритган ҳамюртимиз Ғиёсжон Бобоев юртимиз шарафини ҳимоя қилади. Шунингдек, ушбу вазнда бугун Жаҳонгир Алимардонов, Мирзоҳид Фармонов, Ҳикматуллоҳ Тўраев ҳам баҳсларга киришади.
81 кгда эса Суҳроб Тўраев, Камолиддин Расулов, Алишер Худойбердиев, Шарофиддин Болтабоев беллашадилар.
Аёллар ўртасида 63 кгда Умидахон Мирхамидова, Зарнигор Адилова, Муҳайё Ибрагимова кураш олиб борса, 70 кгда Адибахон Ўрозбоева, Олмахон Эгамбердиева, Шоҳиста Назарова, Гулноза Матниёзова баҳсларга киришади.
Спортчиларимизга омад тилаймиз.
Фикрлар