"Uzbek Tigers" ikkinchi uchrashuvga o‘ta kuchli bokschilarni jalb qildi
Boks olamida eng nufuzli musobaqaga aylanib borayotgan The World Series Boxing (WSB) - Butunjahon boks seriyalarining VII mavsumida ishtirok etayotgan "Uzbek Tigers" jamoasi ikkinchi uchrashuvini Qozog‘istonning "Astana Arlans Kazakhstan" jamoasiga qarshi o‘tkazadi.
Dastlabki uchrashuvda safarda Xitoyning "China Dragons" bokschilariga 2:3 hisobida mag‘lub bo‘lgan jamoamiz murabbiylari ikkinchi uchrashuvga o‘ta kuchli tarkib - Rio Olimpiadasida o‘zini ko‘rsatgan charm qo‘lqop ustalarini jalb qildi.
18 fevral kuni Qozog‘istonning Toldiqo‘rg‘on shahridagi "Zhastar Sports Palace" sportu majmuasi mezbonlik qiladigan "Astana Arlans Kazakhstan" - "Uzbek Tigers" uchrashuvi beshta vazn toifasida o‘tkaziladi.
"Uzbek Tigers" jamoasi sharafini quyidagi bokschilar himoya qiladi:
52 kg: Abrorjon Qodirov,
60 kg: Murodjon Ahmadaliev (Olimpiya o‘yinlari sovrindori),
69 kg: Shahram G‘iyosov (Olimpiya o‘yinlari kumush medal sohibi),
81 kg: Bektemir Meliqo‘ziev (Olimpiya o‘yinlari kumush medal sohibi),
+91 kg: Bahodir Jalolov.
Murabbiylar shtabi To‘lqin Qilichev, Rahmatjon Ro‘zioxunov va Ravshan Xo‘jaevdan tarkib topgan. Jamoa shifokori vazifasini Komiljon Rasulov bajaradi.
Fikrlar