Хуршид Мухторов: "Насаф" - юлдузлар фабрикаси

Куни кеча яна бир футболчи “Насаф” клуби аъзосига айланди ва “Қизилқум” жамоасига қарши учрашувда илк марта майдонга тушди. Бу футболчи – Хуршидбек Мухторовдир. Қарши клуби расмий сайти эса 23 ёшли футболчи билан сухбат уюштирди.

Футболчи ҳақида умумий маълумотлар

Исми шарифи: Хуршидбек Мухторов

Туғилган санаси: 2 сентябр 1994 йил (23 ёш)

Туғилган жойи: Гулистон шаҳри

Амплуаси: ҳимоячи

Рақами: 28

Ўйнаган клублари: “Гулистон” (Гулистон), “Локомотив” (Тошкент), “Қўқон 1912” (Қўқон), “Сўғдиёна” (Жиззах), АГМК (Олмалиқ), Ўзбекистон ОТЖда ҳам майдонга тушган.

2018 йил июл ойидан – “Насаф” клуби аъзоси

"9 ёшимдан футболга қадам ташладим. Менинг футболга қизиқишимни онам қўллаб-қувватлаганлар ва Гулистон шаҳридаги БЎСМга олиб борганлар. Футболдаги илк устозим Рустам ака Орипов бўладилар. Катта футболдаги фаолиятимни 2013 йилдан бошладим. Шу вақт мобайнида бир неча таниқли мураббийлар қўл остида фаолият юритдим. Мана энди “Насаф”дек номдор клубнинг аъзосиман.

“Насаф” клубидан  менга одиндан  қизиқиш бўлганини сезганман.  Аммо клубга ўтишим ҳозир жуда тез рўй берди. Клуб раҳбарияти кеча, ўйин куни мени рўйхатдан ўтказишди.

Жамоанинг айрим ўйинчилари билан олдиндан яқин таниш бўлганман. Улар билан олимпия терма жамоамизда ҳам бирга ўйнаганман. Мени бу ерда яхши қабул қилишди. Мақсадим тез орада жамоанинг тўлақонли аъзосига айланиш. Менимча бу борада менга осон бўлади. Чунки, жамоадаги муҳит жуда зўр. Клубдаги ҳамма шароит муҳайё қилинган. Мамлакатимиздаги кўп клубларнинг ҳали бундай шароитга эга бўлиш - орзу бўлиб турибди. Қолаверса, “Насаф”дек клубда ўйнаш, аксарият футболчиларнинг орзуси ҳисобланади.

Мени чап қанот ҳимоячиси ҳисоблашади. Аммо иккала қанотда ҳам ўйнай оламан. Мураббийларимиз майдонни қаерида ўйнатишса, ўзимни кўрсатишга ҳаракат қиламан.

“Насаф” асосан жамоавий ўйинга асосланган жамоа. Бу ерда футболчи бошқаларга нисбатан, сал кўпроқ ҳаракат қилса, тезда кўзга ташланади. Клубда номдор футболчи бўлиши учун муҳит ва шароит мавжуд. Ўйлашимча, бу имкониятни бой бермаслик керак. Мақсадим, янги жамоамга фойдам текса ва жамоам ютуқларига ҳисса қўшсам. Бу ўзим учун ҳам, клубимиз учун ҳам фойдали бўлади. “Насаф”ни юлдузлар  фабрикаси дегим, келади.

Кеча бўлиб ўтган ўйин ҳақида? “Насаф”нинг биргина ўйини билан баҳо бериш, хато бўлади. Ҳамма жамоада ҳам пасайиш ёки ўсиш бўлади. Шуни тўлиқ ишонч билан айта оламанки, “Насаф” шу таркиби билан ҳам ўз мавқиени сақлаб қола олади. Буни аввал четдан сезиб турган бўлсам, энди жамоа ичидан туриб айтаяпман. Бунга энди менда ҳеч қандай шубҳа йўқ. Жамоадошларимда иштиёқ жуда кучли. Ҳамма футболчилар мураббийларимиз кўрсатмаларини бажариб, ўзини кўрсатишга,  жамоага фойда келтиришга ҳаракат қилишади. Айтингчи, бундай жамоа ўз мақсадига эришмай қоладими? Менимча ортиғига ҳам эришади. “Насаф” ҳали ўз сўзини айтади", - дейди Хуршидбек Мухторов.