А Серияда чемпионликни "Аталанта"га беришадими?

Дунёга машҳур Change.org петиция сайтида бу мавсум А Серия чемпионлигини “Аталанта” клубига бериш бўйича петиция жойлаштирилди.

Гап шундаки, Бергамо коронавирусдан энг кўп зарар кўрган Италиядаги шаҳар ҳисобланади. Ҳозиргача мамлакатда 15 мингдан ортиқ одам коронавирусдан вафот этди. Қурбонларнинг 9 мингга яқини Ломбардия ҳудудига тўғри келади. Бергамо эса ушбу ҳудудда жойлашган аҳолиси 120 минг нафар бўлган шаҳардир. Бу шаҳарда вирус қурбонлари 5 мингдан ортди. Шаҳар крематорийси бунчалик кўп ўликни сиғдира олмаяпти ва натижада жасадлар бошқа шаҳарлардаги крематорийларга юборилмоқда.

“Аталанта” деярли Чемпионлар лигасининг 1/4 финалига чиқиб бўлди. А Серияда эса 4-ўринда кетмоқда. Бу жамоага сўнгги икки йилда спортда кўрсатган муваффақиятлари ҳамда Бергамода коронавирусдан вафот этганлар шарафига Скудеттони беришни таклиф қилишмоқда.