Африка жамоаси Швециядаги турнирдан сўнг бедарак йўқолди

Швециянинг Гётеборг шаҳрида ўтказилган халқаро ёшлар футболи мусобақаси Gothia Cup пайтида Эфиопиядан келган жамоалардан бири таркибидаги 20 нафар киши ғойиб бўлди. Полиция маълумотларига кўра, уларнинг йўқолиши эҳтимолан ихтиёрий равишда, ноқонуний миграция мақсадида амалга оширилган, дея хабар бермоқда The Local нашри.

Бу йилги мусобақада жами 77 давлатдан жамоалар иштирок этган, улар орасида Эфиопиядан тўртта жамоа ҳам бор эди. 

Швеция ҳуқуқни муҳофаза қилиш идоралари маълум қилишича, финал куни футболчилар ва уларга ҳамроҳ бўлган катталар яшаб турган мактаб ходимлари бутун гуруҳ жойни тарк этганини аниқлаган.

Мусобақа ташкилотчилари дарҳол полицияга мурожаат қилган. Турнир якунланганига ўн кун ўтган бўлса-да, йўқолганлар қаердалиги ҳали ҳам номаълумлигича қолмоқда.