Агент: ЦСКА бу нархга Файзуллаевни бермайди!
“Пахтакор” тарбияланувчиси Аббосбек Файзуллаев август ойида ЦСКАга кўчиб ўтганидан кейин янги жамоасига жуда тез киришиб кетди. 20 ёшли футболчимиз қисқа фурсатда жамоанинг асосий футболчиларидан бирига айланди.
ЦСКА ҳужумларини ташкил этишда жонбозлик кўрсатаётган легионеримиз Россия Премьер-лигасининг биринчи давраси асосий кашфиёти сифатида эътироф этилмоқда. Таниқли футбол агенти Герман Ткаченко унинг компанияси мижози ҳисобланган ўзбек футболчисига бир қатор бошқа жамоалар ҳам харидор бўлганини айтди.
.jpg?1700538126646)
– Аббосбек Файзуллаев трансфери борасида ЦСКАда унинг имкониятларига шубҳаланиш бор эди. Лекин трансфер учун у қадар катта бўлмаган маблағ талаб этилган бу иккиланишни катта муаммо даражасига кўтаргани йўқ.
Файзуллаевнинг муваффақиятли ўйнаб кета олгани мураббийлар штабига ҳам боғлиқ. Улар футболчини ўрганиб чиқишди. Кўпчилик бу ўйинчи бир неча йилдан кейин очилади, деб ўйлаганди. Табиийки, биз ҳам Файзуллаевдан умид қиландик, лекин ҳаммаси буқадар тез бўлишига ишонмагандик. Уни бошқа клубларга ҳам тавсия қилганмиз...
– “Локомотив”гами?
– Йўқ. “Локомотив”дагилар бу ўйинчини биларди, лекин трансфер борасида ҳеч қачон гап очишмаган. Биз Москванинг “Динамо” клубига Файзуллаевни олишни тавсия қилгандик. Улардан жавоб бўлмади.
Апрель ойида ёшлар ўртасидаги Осиё чемпионатида Аббосбек Файзуллаев энг яхши ўйинчи бўлган эди. Ўша турнирдан кейин ЦСКА уни кузатиб боришини билдириб, ижара масаласини ҳал қилишни сўради.
Яна иккита жамоа уни жуда қаттиқ қизиқиш билдирди ва бизни қийнаб юборди. Булар “Пари Нижний Новгород” ва “Алания”. “Алания”нинг скаутлари жуда яхши ишлайди.
– Файзуллаев қишда ЦСКАдан кетмайдими?
– Йўқ.
– Туркиядан 3-4 миллион евролик таклифлар борлиги ҳақида хабарлар тарқади...
– Ўйлашимча, ЦСКА 3-4 миллион евролик таклифларни ўйлаб ҳам кўрмайди. Агар Аббос баҳорда ҳам шундай ўйнашда давом этса бу сумма уч бараваргача кўтарилади.
_1.jpg?1700538116424)
Эслатиб ўтамиз, Аббосбек Файзуллаевни тарбиялаган “Пахтакор” ўйинчи билан имзоланган шартномадан келиб чиқиб, уни 500 минг еврога қўйиб юборди. ЦСКАга борганидан кейин Премьер-лига ва Россия кубогида жами 14 та учрашувда майдонга тушган ҳамюртимиз битта гол ва олтита ассист қайт эди.
Трансферларга ихтисослашган transfermarkt.world сайтига кўра, легионеримизнинг бугунги кундаги трансфер нархи 2 миллион еврони ташкил қилмоқда.
Фикрлар