AGMK "Bunyodkor" ustidan tarixiy g‘alabani qo‘lga kiritdi

Superliganing 22-turida Toshkentda "Bunyodkor" mehmoni bo‘lgan AGMK chempionat doirasida ilk bor safarda "qaldirg‘ochlar"ni mag‘lub etib, tarixiy g‘alabasini qo‘lga kiritdi.

Birinchi bo‘limdayoq uchrashuv taqdirini hal etgan olmaliqliklar dastlab Mirjamol Qosimovning raqibdan to‘pni olib qo‘yishini natijasida yuzaga kelgan tezkor hujumdan foydalanishdi. Shahzod Nurmatov tomonidan tepilgan zarbani Zuhurov qaytarishda xatoga yo‘l qo‘ydi. Qaytgan to‘pni esa Murod Toshmatov darvozaga yo‘llab, o‘yinda hisobni ochdi. Birinchi bo‘limga qo‘shib berilgan daqiqalarda esa ketma-ket burchak zarbasini amalga oshirgan AGMK ikkinchi golni urishni uddaladi. Toshmatovning uzatmasidan keyin Bobur Yo‘ldoshev boshi bilan darvozani ishg‘ol etib, tanaffusga jamoani ishonchli hisobdagi g‘alaba bilan taklif qildi.

Ikkinchi taymda esa Qosimov shogirdlari juda ishonchli va tartibli himoyalanishdi va raqibga darvozani ishg‘ol etish imkoniyatini berishmadi. Hujumda esa xavfli vaziyatlar yaratgan AGMK uchinchi golni urishda biroz adashdi. O‘rtada stadion chirog‘i o‘chib qolib, o‘yin 67-daqiqadan 20 daqiqaga yaqin to‘xtab turdi. So‘ngra chiroq kelgach davom etgan bahsda boshqa gollar urilmadi va yakunda olmaliqliklar "Bunyodkor"ni chempionat doirasida ilk bor Toshkentda mag‘lubiyatga uchratdi.