АГМК матбуот хизмати айюҳаннос солиб, дербидаги ҳакамликка 7 та жиддий эътироз билдирди (видео)

Ўзбекистон Суперлигаси дастлабки турида "Металлург" ўз майдонида АГМК устидан кичик ҳисобда зафар қучди, 1:0. Беллашувдан сўнг олмалиқликлар матбуот хизмати ўйин бош ҳаками қарорларини кескин танқид қилди.

"Фирдавс Норсафаров негадир ўйин давомида икки хил стандартлар бўйича қарор чиқарди. АГМК фойдасига, "Металлург" зарарига бўлган вазиятларни юмшоқлик билан, имтиёзлар тақдим этгандек туюлди. Аксинча, АГМК зарарига, "Металлург" фойдасига эса қаттиққўл ҳакам режимида, ҳаммасини тўғри қилаётгандек юқори ишонч билан қарорлар чиқарди.

Аслида эса учрашувда мезбон жамоа вакиллари ўта қўпол ҳаракатда бўлишгани, кескин чоралар бизнинг футболчиларга нисбатан ишлатилгани кўплаб саволларни юзага келтирмоқда.

Суперлига ва Ўзбекистон кубоги доирасида ўтган мавсумдаги охирги ўйинлари, дарвозамизга белгиланган пенальтилар ва янги мавсум ҳам ўтган йилги финишдагидек бошлангани умуман тушунарсиз ҳолат. Ҳакамлар қоидани охирги ўйинларда АГМК зарарига тўғирлаб, рақиб фойдасига ишлатиш тажрибасини кенг қўллашмоқда.

Факт шуки, охирги 3 ўйинда жамоамиз дарвозасига 4 та пенальти ва жамоамиз футболчиларига 3 та қизил карточка кўрсатилди.

Ўйлаймизки, шикоятни тегишли ташкилот вакиллари кўриб, ўрганиб, таҳлил қилиб, кейин оқилона қарор чиқаришади. Умид қиламизки, келгусида ҳакамлар АГМК ўйинларида икки хил стандартдаги қарорларни мавжуд стандартлар асосида барчага тенг ҳолатда қўллашади.

Дастлабки ҳолат, яъни учрашувнинг 15-дақиқасида Миржамол Қосимовга нисбатан рақиб футболчиси Фарҳод Бекмуродов икки оёқлаб сакраган ҳолда ўта қўпол тажовузкор ҳаракатни амалга оширди. Бекмуродов ўша вазиятда тўпга эмас, айнан Миржамол Қосимовга агрессив ҳаракатда жароҳат етказди. Вазиятга яқин турган Норсафаров эса Фарҳод Бекмуродовга сариқ карточка кўрсатиш билан чекланди, холос. Тўпга эмас, рақибга нисбатан атайин кескин ва агрессив ҳаракатда ўйнаган вазиятларни жаҳон футболида қизил карточка билан сийлашади. Норсафаров эса бу вазиятда қаттиққўл ёки қоидага амал қилишдан кўра юмшоқроқ қарор чиқариш билан чекланди!

Иккинчи эътирозли вазият: Учрашувнинг 20-дақиқасида "Металлург"нинг ўнг қанотдан амалга оширган ҳужуми, яъни Норбековнинг тўп узатмасидан кейин жарима майдончасидаги ҳимоячимиз Сардор Раҳмонов тўпни аввал тепиб юборади. Иккинчи вазиятда тўпга яқинлашаётган Раҳмоновни рақиб ҳужумчиси Забиҳилло Ўринбоев очиқча туртиб юборади ва мувозанатни йўқотган Раҳмонов тўпга ўйнаш имкониятидан мосуво бўлиб, ерга йиқилаётганда жамоадоши Абдулла Абдуллаев билан тўқнашиб кетиб йиқилмайди. Бош ҳакам Норсафаров эса бу вазиятда фол қайд этишни унутади. Кейинги ҳолатда эса тўпга эга чиққан Ўринбоев ҳимояланишга ошиқаётган Раҳмонов билан курашда симулация аралаш йиқилгач Норсафаров жамоамиз дарвозасига пенальти қўяди!

Учинчи вазият: Учрашувнинг 43-дақиқасида жамоамиз бурчак зарбасини ижро этгач иккинчи темпда ҳужум давом этгач жарима майдончаси ичида рақиб футболчиси Ихтиёр Тошпўлатов тўпга ўйнамоқчи бўлган Андрей Мишенкони очиқчасига иккала қўли ёрдамида ушлаб қолиб, Мишенкони ҳужумдаги ҳаракатини чеклади. Бу вазиятда Норсафаров жамоамиз фойдасига пенальти белгиламади. Айнан ўша бурчак зарбаси тепилаётган вазиятда ҳам узоқ бурчакда рақиб футболчиси Фозил Мусаев Хуршид Ғиёсовни очиқчасига ушлаб олган ҳолда вазиятдан зарарсизлантириб ўтирди. Норсафаров бир вазиятда икката пенальтига тортадиган эпизодни кўрмади. Айнан АГМК фойдасига чиқарилиши керак бўлган қарорлар чиқарилмагани ажабланарли.

Тўртинчи вазият бўйича шикоят қуйидагича: Учрашувнинг 44-дақиқасида "Металлург" футболчиси Худойшукур Сатторов тўпни ўзидан узоқлаштириб юбориб, қарши ҳужумни ўтказиб юбормаслик мақсадида Муроджон Тошматовнинг тиззасига бутсаларининг таг қисми билан очиқчасига зарба йўллади. Ҳакам ушбу вазиятга яқин бўлишига қарамасдан, жароҳат етказган футболчига умуман карточка кўрсатмади. Ушбу вазиятда Худойшукур Сатторовнинг кескин ҳаракати қизил карточкага лойиқ эди қоида бўйича.

Бешинчи эътирозли ҳолат: Учрашувнинг 45-дақиқасида жамоамиз яна бурчак зарбаси тепди. Дарвозанинг яқин устуни ёнгинасида яна Фозил Мусаев футболчимиз Хуршид Ғиёсовни либосидан тортиб, футболчимизни ерга қулатади ва бу вазиятда табиийки Мусаев Ғиёсовга тўпни дарвозага йўллашга имконият бермайди. Қоидага кўра, бундай ҳолатлар пенальти эканлигини футбол ишқибозлари ҳам билади. Лекин ушбу вазиятда Норсафаров жамоамизга нисбатан кўрсатган қаттиққўллиги ёки қоида риоя қилишини рақиб "Металлург"га нисбатан ишлатмади. Ажабланарли.

Олтинчи эътирозли вазият бўйича изоҳ: Учрашувнинг 50-дақиқасида тўп учун қизғин курашда Санжар Турсунов Ихтиёр Тошпўлатовдан тўпни олиб қўяди. Тўпни йўқотган футболчи аламзадалик билан Турсуновнинг ортидан келиб, икки оёқлаб унга ташланиб, футболчимизга атайин жароҳат етказди. Ушбу вазиятда Норсафаров Тошпўлатовга қизил карточка кўрсатишни яна "унутиб" қўйди шекилли. Эътибор беринг, учрашувнинг 50-дақиқасида бўлган ҳолат бу. Агарда ўшанда рақибга ҳам АГМКга нисбатан қаттиққўл ва кескин қоида бўйича чиқарган қарорларини "Металлург"га ҳам ишлата олганида, жамоалар қолган 40 дақиқани тенг ҳолатда ўтказган бўлишарди. Бу эса футбол мухлисларига кўпроқ тоза футбол тақдим этиш имкониятини яратарди. Ҳакам эса мувозанатни қўлдан чиқаргани, мезбонларга истаганча ҳаракат қилиш имтиёзини бериб қўйгандек. Акс ҳолда мезбонлар бу қадар кескин ва кўплаб қоидаларни бузишмасди.

Еттинчи вазият: Учрашувнинг 84-дақиқасида рўй берган ҳолат, яъни жамоамизнинг ўнг қанотдан ташкил этган ҳужуми пайтида "Металлург" футболчиси Иброҳим Иброҳимов тўпга кескин ("подкат" ташлаб) ўйнаб, уни майдон ташқарисига чиқариб юборади. Ибрагимов кескин ҳаракати давомида Шохруҳ Гадоевни майдонга йиқилишига сабабчи бўлди. Ерга орти билан йиқилган Гадоев мувозанатини йўқотган ҳолда, ердан йиқилаётиб, оёқлари билан Ибрагимовнинг бош қисмига урилади. Бош ҳакам Фирдавс Норсафаров ушбу вазиятда негадир яна китобни очиб, қоидаларни майдонда ўқий бошлади ва Гадоевга қизил карточка кўрсатди. Ушбу ҳолатда футболчимиз ҳаракати жазога лойиқ, лекин тўғридан-тўғри қизил карточка ортиқча эди",-дея ёзилади клуб "Телеграм" каналида.

АГМК матбуот хизмати