Акмал Рустамов: "Биз янги ҳужумчи қидирамиз"

Ўзбекистон Кубоги иккинчи тур доирасида “Қизилқум” ўз майдонида “Бунёдкор”га 0:2 ҳисобида ютқазиб қўйди. Натижада иккита ўйинда имкониятни бой берган навоийликлар гуруҳда қолиб кетишди.

“Бунёдкор”га қарши учрашувдан сўнг “Қизилқум” бош мураббийи Акмал Рустамов матбуот анжуманида қуйидаги фикрларни билдирди:

- Ўйинга келадиган бўлсак, яхши нарса билан бошланмади. Асосий таркибдаги 6 нафар футболчимиз сафдан чиққанди. Норхонов билан еттинчиси бўлди. Оёғи сингани яхши иш бўлмади. Тайёргарликни яхши олиб боргандик. Лекин кўрдинглар, улар вазиятларидан фойдалана олишди. Биз эса имкониятларимизни голга айлантира олмадик. Бизда иккита бир хил таркибимиз йўқ. Асосий таркибдаги 6-7 нафар футболчимизни жароҳат олгани натижага таъсир қиляпти. Лекин уларни ўрнига чиққан ёшларимизни синаяпмиз. Мана шундай пайт синамасак, қачон  синаймиз? Уларни ўрнини боса олмаяпти, десам нотўғри бўлади. Ҳаракат қилишяпти, барибир классда фарқи бор. Класс ўз сўзини айтади. Ўйлайманки, биринчи даврадан кейин жароҳат олган ўйинчиларимиз сафга қайтишса, янги қон қуйсак, Худо хоҳласа ишимиз олдинга кетади, деб ўйлайман.

Кубокда яна битта ўйинимиз қолди. Шундан кейин биз таътилга чиқамиз. Айтишим керакки, биз албатта янги ҳужумчи қидирамиз. Чунки айтиб ўтганимдек, жамоамизга янги қон керак. Шу ўринда тартиб-интизом ҳам, рақобат ҳам керак. Умид қиламанки, иккинчи даврада кучаямиз ва ҳаммаси яхши бўлади. Ўтган йилги чемпионатни 9-ўринда тугатгандик, бу йил эса ундан юқорироқда бўлишни хоҳлаймиз.