Акмал Рустамов: "Бизнинг кунимиз эмас экан"

Навоийда бўлиб ўтган “Қизилқум” – ОКМК (0:1) учрашувидан кейинги матбуот анжуманида мезбонлар бош мураббийи Акмал Рустамов мағлубият сабаблари ҳақида фикр билдирди.

- Аввало, яқинлашаётган байрам ҳаммамизга муборак бўлсин. Яхши ўйин кўрдик. Бу учрашувга яхши тайёргарлик кўргандик. ОКМК жамоаси 3 та ўйинда 1 очко тўплаб турнир жадвалида пастки ўринларда бораётгани боис тезроқ юқорига кўтарилишни режалаштиргани аниқ эди. Буни билардик, футболчиларимиз ҳаракат қилишди, уларга раҳмат айтмоқчиман. Мухлислар ҳам қўллаб-қувватлашди, барчасига раҳмат. Бугун бизнинг кунимиз эмас экан.

- Ҳимояда бир қатор хатоликлар кузатилди. Бу ҳақида нима дея оласиз?

- Майдонга ҳар доим 11 нафар футболчи майдонга чиқади ва улар ҳам хато қилади. Футбол хатосиз бўлмайди. Биргина вазиятда мувозанатни йўқотганимиз бизга қимматга тушди. Яратилган имкониятларимизни голга айлантира олмадик. Иккита ўйинда ғалаба қозонганимиздан кейин футболчиларда ишонч анча ортганди. Улар борларини беришгани учун раҳмат айтаман. Яратилган вазиятларимиз голга айланмади.