Ал-Ҳелайфи: "Лилль" "Реал Мадрид"ни, "Монако" эса "Барселона"ни енггани барча француз клублари учун ғалабадир"

ПСЖ президенти Носир Ал-Ҳелайфи ЛФП (Профессионал футбол лигаси) штаб-квартирасидаги тадбир чоғида Париж клубининг Чемпионлар Лигаси ғалабасига бағишланган нутқ сўзлади ва бу воқеани Франция футболи ривожи учун муҳим омил сифатида таъкидлади.

"Бу муваффақиятга ҳар бир киши ўз ҳиссасини қўшди. Биз бу ажойиб совринни қўлга киритиш учун тинимсиз меҳнат қилдик. Бу фақат ПСЖ эмас, балки бутун Франция футбол оиласи бу ғалабани қўлга киритиш учун ишлади. Биз француз клубларини ҳимоя қиламиз — бу биз учун жуда муҳим. УЕФА "Брест" футболчиларини еврокубокда иштирок этишлари билан табриклаганда, улардан бағоятда фахрландим. "Лион" Европа Лигаси чорак финалига чиққанида ҳам фахрландим. "Лилль" "Реал Мадрид"ни, "Монако" эса "Барселона"ни енггани бу бутун француз футболи, барча француз клублари учун ғалабадир. Бу чемпионликни қўлга киритиш учун ҳеч қачон таслим бўлмадик. Биз буюк мураббий, буюк спорт директори, буюк футболчилар ёрдамида ғалаба қозондик, лекин энг муҳими — биз жамоа бўлишни билдик.

Келинг, ижобий бўлайлик, биз мақсадимизга етамиз, у узоқ эмас! Мен Премьер-лига, А Серия, Испания ва Германиядан кўплаб футболчилар билан гаплашдим... Бизнинг чемпионат ҳам худди улар даражасида. Француз клублари "Реал Мадрид", "Барселона", "Ливерпуль", "Ман Сити"ни енгди... Бу нимани англатади? Бу бизнинг аҳамиятимиз борлигини англатади. Ҳавотир олманг, биз мақсадимизга етамиз. Мен фақат битта нарсани сўрайман: бирликда бўлайлик", — дея Ал-Ҳелайфининг сўзларини келтирди RMC Sport нашри.