Амбициям жуда катта! Зидан Франция терма жамоасига тайинлангандан кейин биринчи баёнотини берди

Франция терма жамоасининг янги бош мураббийи Зинедин Зидан расман тайинланганидан сўнг ўз таассуротлари билан ўртоқлашди. 

- Мен кўп марта айтганман: Франция терма жамоасидан муҳимроқ нарса йўқ. Шунинг учун мен учун миллий жамоага бош мураббий этиб тайинланиш — беқиёс қувонч ва, албатта, катта фахр. Бу билан бирга жуда катта масъулият ҳамдир.

Президент Филипп Диалло, Ижроия қўмитаси ва Франция футбол федерациясига менга билдирган ишончлари учун миннатдорчилик билдираман. Шу билан бирга, Дидье ва унинг штаби томонидан ўтган ўн тўрт йил давомида қилинган меҳнатни алоҳида эътироф этмоқчиман. Бугун мен ўзимга устозлик қилган барча мураббийларимни ҳам алоҳида меҳр билан ёдга олаяпман.

Алоҳида таъкидлаш шарт ҳам эмас, Франция терма жамоаси билан боғлиқ режаларим ва амбицияларим жуда катта!, — деди у.

Зидан билан тузилган шартнома тўрт йилга мўлжалланган — 2030 йилги жаҳон чемпионатига қадар. У расман ишини 1 августдан бошлайди, мураббийлар штаби таркибини эса сентябр ойи бошида эълон қилиши кутилмоқда.

Зидан бошчилигидаги Франция терма жамоасининг илк учрашуви 25 сентябр куни сафарда, УЕФА Миллатлар лигасида Туркияга қарши ўйин бўлади. Кейинчалик французларни Бельгия ва Италия терма жамоаларига қарши беллашувлар кутмоқда.