Америка сеҳрли диёр: Франция – Ироқ учрашуви тўрт соат давом этди ва рекорд ўрнатди

Жаҳон чемпионатининг “I” гуруҳидаги 2-тур учрашувида Франция ва Ироқ миллий терма жамоалари ўзаро куч синашди.

Учрашув АҚШнинг Филадельфия шаҳридаги «Линкольн Файненшел Филд» стадионида бўлиб ўтди. Унда Европадан келган футболчилар Килиан Мбаппенинг дубли ва амалдаги “Олтин тўп” соҳиби Усмон Дембеленинг мундиаллардаги дебют голи эвазига 3:0 ҳисобида зафар қучди.

SportyTV маълумотига кўра, мазкур баҳс жаҳон чемпионатлари тарихидаги энг узоқ давом этган ўйин бўлди. Учрашув жами 4 соат давом этди.

Эслатиб ўтамиз, биринчи бўлим охирида Филадельфияда кучли ёмғир бошлангани сабабли иккинчи бўлим икки соатга кечиктирилди.

Штат қоидаларига мувофиқ, чақмоқ чаққандан кейин камида 30 дақиқа ўтмагунча футболчиларнинг майдонга қайтишига рухсат берилмайди.

Франция икки ўйиндан кейин 6 очко билан “I” гуруҳ пешқадами бўлиб турибди ва плей-офф йўлланмасини кафолатлади. Кейинги учрашувни французлар 26 июнь куни Норвегияга қарши ўтказади.