Аморим янги жамоасига Манчестердан футболчи олиб келади

"Манчестер Юнайтед" ярим ҳимоячиси Мануэль Угарте яқин вақтларда "Милан" сафига ўтиши мумкин. Бу ҳақда футбол бўйича инсайдер Николо Скира хабар берди.

Манбаларга кўра, "Милан"га 25 ёшли уругвайлик футболчини олиш таклиф қилинган. Агар битим амалга ошса, Угарте Италия клубида яқин орада жамоанинг янги бош мураббийи сифатида иш бошлайдиган Рубен Аморим қўл остида ўйнайди. 

Шу билан бирга, ҳозирча клублар ўртасида Угартенинг трансфери бўйича расмий музокаралар бошланмагани таъкидланмоқда.

Угарте 2025/26 йилги мавсумда барча мусобақалар доирасида 24 ўйинда майдонга тушди, аммо гол ёки голли узатма қайд этмади. Transfermarkt портали баҳосига кўра, футболчининг бозор қиймати 25 миллион еврони ташкил этади.