Ана холос! Азар “Реал”дан кетади. У ўзига янги жамоа танлади

“Реал” юлдузига айлана олмаган Эдин Азар ёзги трансферлар вақтида Мадридни тарк этишга қарор қилди.

Маълумотларга қараганда, 30 ёшли футболчи собиқ клуби “Челси”га қайтишни истаяпти. Эден ПСЖ ҳужумчиси Килиан Мбаппенинг “Қироллик клуби”га трансфер қилиниши унинг жамоа таркибига кириш йўлларини ёпиб қўйишидан чўчимоқда.

Аввалроқ, “Челси” ҳам Азарни ортга қайтаришни режалаштираётгани маълум қилинганди. “Реал” ҳам ўзини кўрсатолмаган футболчи ёзда трансферга қўйилишини билдирган.

Маълумки, Криштиану Роналду “Ювентус”га ўтиб кетганидан кейин Флорентино Перес португалиялик юлдузнинг ўрнини босиш мақсадида Азарни 115 миллион еврога харид қилган эди. Бироқ, бельгиялик футболчи испан футболига мослаша олмади ва асосий вақтини жароҳатларини даволашга сарфлади.

Жорий мавсумда Эден примерада 14 та ўйинда майдонга тушиб, иккитадан гол ва голли узатма муаллифи бўлди.