Ана холос: Гвардиола ёзда кетади, ўрнига мураббий топилди

“Манчестер Сити” раҳбарияти ва бош мураббий Хосеп Гвардиола мавсум якунида ҳамкорлик давом эттирилиши ёки тўхтатилиши ҳал этиладиган муҳим учрашув ўтказади.

Бу ҳақда X ижтимоий тармоғидаги Topskills Sports UK аккаунти хабар бермоқда.

Манбага кўра, Гвардиоланинг келажаги яқин ойлардаги натижаларга боғлиқ бўлади. Агар жорий мавсум клуб раҳбарияти кутган натижаларни бермаса, мураббийнинг кетиши реал вариант сифатида кўриб чиқилади.

Қайд этилишича, “шаҳарликлар” Гвардиола 2026 йил ёзида жамоани тарк этган тақдирда, унга ўринбосар сифатида кўрилаётган италиялик мутахассис Энцо Маресканинг вакиллари билан аллақачон алоқа ўрнатган.

Яқинда “Челси”дан истеъфога чиқарилган Маресканинг ўзи “Манчестер Сити”да ишлашга жуда қизиқмоқда ва бош мураббий лавозимини эгаллашга тайёр.

Гвардиоланинг “Манчестер Сити” билан тузган шартномаси 2027 йил ёзигача амал қилади.