Ана холос: Жамоа Еврокубокларга чиқмаса, асосий юлдузининг маоши кескин ошади

Испания терма жамоаси форварди Нико Уильямс ўтган ёз Бильбаонинг “Атлетик” клуби билан ўн йиллик янги шартнома имзолаган эди. Ҳамкорлик узоқ йилларга мўлжалланганига қарамай, битимда 23 ёшли ҳужумкор футболчининг бошқа клубларга ўтишини таъминловчи бандлар бор.

Англия Премьер-лигасидан “Ливерпуль” ва “Тоттенхэм” Никога даъвогарлик қилмоқда. TEAMtalk нашри хабар беришича, ҳар икки клуб футболчининг шартномасида белгиланган сотиб олиш опциясини фаоллаштиришга тайёр.

Бильбаоликлар Нико Уильямс учун 95 миллион евро таклиф қилинса, ўйинчини қўйиб юборишга мажбур бўлади.

Жамоанинг асосий юлдузига чиқиш эшикларини очадиган яна бир омил бор. Агар “Атлетик” мавсум якунида Еврокубокларга чиқа олмаса, Нико Уильямснинг маоши ҳафтасига 195 минг еврогача кўтарилади. Ҳозир жамоа Испания чемпионатида 11-ўринда бормоқда.

Уильямсга клуб бюджетига оғирлик қиладиган маош тўлагандан кўра, бильбаоликлар уни сотиб юбориб, ғазнага мўмай даромад тушириш имкониятидан фойдаланиши кутиляпти.