Ана холос! ПСЖ юлдузи клуб билан шартномани бекор қилмоқчи

"Париж Сен-Жермен" дарвозабони Жанлуижи Доннарумма клуб билан шартномани муддатидан олдин бекор қилишга тайёр, деб ёзади журналист Бен Жейкобс Х ижтимоий тармоғида.

Унга кўра, италиялик посбон фаолиятини давом эттириш учун клуб топилмаса, ПСЖни муддатидан олдин тарк этишга тайёр. Қайд этилишича, Доннарумма вакиллари ҳозирча Жанлуижи хизматига қизиқиш билдирган "Галатасарой" ва "Манчестер Юнайтед" билан "жиддий музокаралар" олиб бормаяпти. Шунингдек, Жейкобснинг таъкидлашича, Доннарумма кейинги клубни танлашда "инжиқ бўлади".

Аввалроқ, ПСЖ 40 млн евро эвазига "Лилль" дарвозабони Люка Шевальени қўлга киритишга яқин тургани маълум бўлганди. Жейкобснинг маълум қилишича, у асосий дарвозабон бўлади.

2024/2025-йилги мавсумда Доннарумма ПСЖ билан Франция чемпионати, кубоги, Суперкубоги ва Чемпионлар лигасида ғолиб чиқди. Италиялик футболчи барча турнирларда 47 та ўйин ўтказиб, 43 та гол ўтказиб юборган. Трансфермаркт портали италиялик футболчининг нархини 40 млн еврога баҳоламоқда.