Ана холос: “Реал” ишонган юлдуз кутилмаганда футболдан кетиши мумкин

“Реал”нинг асосий ҳимоячиси Антонио Рюдигер қийин аҳволда қолди. “Барселона”га қарши учрашувда жароҳат олган ва кейинчалик ҳакамга ҳамла қилган германиялик футболчи профессионал фаолиятини якунлаши мумкин.

El Confidencial нашрининг ёзишича, Рюдигер жароҳат даражасини аниқлаш учун чуқурлаштирилган тиббий текширувдан ўтказилганида, унга остеоартроз ташхиси қўйилди. Бу профессионал спортчилар учун оғир ташхис ҳисобланади.

Маълумотларга қараганда, остеоартроз бўғимлардаги тоғайларни емирилишига олиб келади.

Манбанинг таъкидлашича, “Реал” раҳбарияти Рюдигернинг саломатлиги билан боғлиқ муаммо борлигини билган, бироқ унинг ўрнига бошқа марказий ҳимоячи олиш масаласини ўз вақтида ҳал қилмаган.

Антонио Рюдигер 2022 йилнинг ёзида “Челси” билан ҳамкорлиги тугаганидан кейин эркин агент мақомида “Реал”га кўчиб ўтган ва қисқа фурсатда жамоа етакчисига айланган. 32 ёшли футболчининг мадридликлар билан шартномаси 2026 йилнинг ёзида тугайди.