Анчелотти аламли мағлубият сабабини айтди

Испания Суперкубоги учун кечган баҳсда “Пеал” футболчилари ашаддий рақиб “Барселона”дан 2:5 ҳисобида қақшатқич мағлубиятга учради.

Ўйиндан кейин мадридликлар бош мураббийи Карло Анчелотти аламли мағлубият сабабларини келтириб ўтди.

- “Реал” умуман ўйнамади, учрашувга тузилган режаларни майдонда амалга оширишнинг ҳеч қандай имкони бўлмади. Биз жуда ёмон ҳимояландик ва бу баҳсда энг катта муаммога айланди.

Рақиб голларни жуда ҳам осон урди, биз юқори прессингда ва чуқур ҳимояда яхши ўйнай олмадик.

Танаффусда мен шогирдларимга футбол ўйнаш кераклигини айтдим, чунки биринчи бўлимдаги ҳаракатлар футбол эмасди. Биз узоқ масофаларга тўпни тепиб юбориш билан машғул бўлдик, бу режамизда йўқ эди.

Ғоямиз ўз футболимизни намойиш қилиш эди, буни эса, уддалай олмадик. Йигитларга ютқазиш мумкинлигини айтдим, лекин бу тарзда эмас, - деди Карло Анчелотти.  

“Барселона” Испания Суперкубогини энг кўп қўлга киритган жамоа ҳисобланади. Каталонияликлар бу совринни 15 бор қўлга киритган. “Реал” эса, мағлубиятга учраганидан кейин Суперкубоклар сони бўйича “Барселона”га тенглашиб олиш имкониятини қўлдан чиқарди.