Анчелотти билан учрашувга тайёрланаётган ўзбек мутахассиси "Реал" Мадридда ишлаш имкониятига эга! Қандай қилиб дейсизми?

Анчадан бери Испания футболи билан яқин таниш бўлган ва Бекободдаги “El Golazo” футбол академияси асосчиларидан бири Зокиржон Ҳолиқов ҳамон изланишдан тўхтамаяпти.

Эндиликда у ўз соҳаси бўйича янада ривожланиш учун олдинга қадам ташлади. Испан ва яна бошқа тилларни чуқур ўзлаштирган ҳамюртимиз айни пайтда Мадридда таҳсил оляпти.

Гап шундаки, дунёга машҳур “Реал” Мадрид ва Европа Университетининг биргаликдаги магистратурасида футбол менежменти бўйича ўқишни бошлади. У ерда жой сони чегараланган бўлиб, дунёнинг турли қитъаларидан қизиқиши, интилиши ва салоҳияти юқори бўлганларгина ўқишга қабул қилинади.

Қувонарлиси, Ўзбекистондан Зокиржон Ҳолиқов ҳам мазкур билим даргоҳида футбол йўналиши бўйича билимини янада ўзлаштириш, етук мутахассис бўлиб етишиши учун таълим олишни мақсад қилди.  Ҳозирда Мадридда фаолиятида янги саҳифа очаётган мутахассис Sports.uz учун барчаси ҳақида батафсил гапирди.

“Бутрагеньо билан маслаҳатлашдим”

- “Реал” Мадрид ва Европа Университетининг биргаликда ташкил этилган магистратураси футбол бошқаруви, яъни, футбол менежменти деб номланади. Бу асосан футбол соҳасида, спорт менежментлари, спорт ва академия директорлари, хуллас, футболда бошқарувни амалга оширадиган соҳа ҳисобланади. Бундан ташқари, техник директорларни тайёрлашга мўлжалланганини ҳам қўшиб ўтишим керак. Магистратурани “Реал” Мадриддаги ҳамкорларимиз менга бир йил олдин тавсия қилишганди. Ўтган бир йил давомида ушбу магистратурани яхшилаб ўргандим. Ҳаттоки, Университет ректори, проректори, “Реал” Мадрид томонидан тайинланган Эмилио Бутрагеньо билан ҳам учрашиб, маслаҳатлашдим. Шунингдек, Университетда дарс берадиган мутахассислар билан ҳам фикр алмашдим. Якунда менга ушбу йўналиш тўғри келишини тушундим. Футбол соҳасида етук мутасадди бўлиш учун мазкур магистратурада ўқишга қарор қабул қилдим.

зокир

“Раул, Касильяс, Арбелоа кабиларнинг машғулот усуллари билан яқиндан танишамиз”

- Магистратура октябрь ойидан бошланди. Унинг очилиш маросими 3 ноябрь куни “Реал” клубининг спорт шаҳри – Вальдебебасда бўлади. Ўшанда Карло Анчелотти ва Эмилио Бутрагеньо ҳам иштирок этишади. Очилиш маросимида Анчелотти билан яқиндан танишиб, суҳбатлашишимиз режалаштирилган. “Реал” Мадриддан чиққан етук инсонлар, клубда фаолият олиб борганлар ва фаолият олиб бораётган мутахассислар дарс беришади. Магистратурадаги ўқишнинг бир қисми “Реал”нинг спорт шаҳри – Вальдебебасда олиб борилади. Ўшанда Эмилио Бутрагеньо, Икер Касильяс, Раул Гонсалес, Алваро Арбелоа, Роберто Карлос каби кўзга кўринган мутахассислар ўзларининг иш тажрибаси, фаолияти, “Реал” Мадриддаги бошқарув тизими қандай йўлга қўйилганлиги бўйича ўз фикрлари билан ўртоқлашади. Бундан ташқари, “Севилья”, “Вильярреал” сингари жамоалардан ҳам мутахассислар келиб дарс беришади. Шу билан бирга Бельгия футбол федерациясидан ҳам тажрибали инсонлар келиб дарс ўтишади. “Порту”, “Зальцбург”, қолаверса, Германия, Франциянинг етакчи клубларидан ҳам биз учун алоҳида мутахассислар ажратилади. Январь ойида бир ҳафта давомида магистратура доирасида иш тажрибасини ўрганишимиз учун бизни Нидерландияга юборишади. У ерда “Аякс”, “ПСВ Эйндховен”, “Фейеноорд” каби клубларнинг ишлаш тизими билан танишамиз. Баҳорда эса Португалияга “Порту”, “Бенфика” ва “Спортинг” клубларининг иш тажрибасини ўрганиш учун бир ҳафталик амалиётга юборишади. “Реал”нинг қароргоҳида Раул, Арбелоа, Касильяс кабиларнинг машғулот олиб бориши усуллари билан ҳам батафсил танишамиз.

зокир3_1

“El Golazo” футбол академиясидаги ишимни ҳам давом эттираман”

- Бекободдаги “El Golazo” футбол академиясидаги фаолиятимни ҳам давом эттиряпман. Мадриддаги магистратура доирасида биз ёз ойигача курс иши ёзишимиз зарур. Бу орқали ўзимизнинг лойиҳамизни кўрсатиб беришимиз керак бўлади. Курс ишимнинг мавзуси ҳам тайёр. “El Golazo”даги келажакдаги фаолиятим бўйича Нидерландия, “Реал” Мадрид ва яна бошқа етакчи клубларнинг иш тажрибасини ҳам ўрганган ҳолда буни айнан “El Golazo” футбол академияси лойиҳасини янада ривожлантириш мақсадида курс ишимда шуни тўлиқ тасвирлаб бермоқчиман.

зокир2

“El Golazo” орқали лойиҳамни амалга татбиқ этмоқчиман”

- Ушбу магистратура давомида юқорида айтиб ўтганимдек, мен нафақат испан футболи тажрибасини, балки Европанинг деярли футболи ривожланган барча давлатларнинг иш фаолиятини ўрганмоқчиман. Бундан ташқари, “Реал” Мадрид томонидан “El Golazo” футбол академиясига юборилган уч нафар испаниялик мураббийлар билан маслаҳатлашган ҳолда ўзбек футболи ривожига тўғри келадиган ўз лойиҳамни ишлаб чиқмоқчиман. Бу орқали футболимизга ўз ҳиссамни қўшмоқчиман ва “El Golazo” орқали лойиҳамни амалга татбиқ этмоқчиман.

“Ла Лига ўйинларини таҳлил қиляпмиз”

- Бу ерда Ўзбекистондан фақат менман. Дарслар испан ва инглиз тилларида бўлади. Жанубий Кореядан ҳам бир нафар бор. Испаниялик ўқувчилардан ташқари, Лотин Америкасидан – Бразилия, Аргентина, Мексика каби мамлакатлардан ҳам бор. Футбол менежменти бўйича магистратурага 30 нафар ўқувчи қабул қилинади. Магистратура пуллик - 12 минг евро. Лекин унга қабул қилинишингиз учун сизда мураббийлик лицензияси бўлиши керак. Кейин сиз билан суҳбат қилинади. Унда мақсад ва вазифаларингиз, келажакдаги режаларингиз билан бўлишасиз. Суҳбатдан яхши ўтсангиз қабул қилинади. Менда Испания футбол федерацияси томонидан берилган “А” ва “В” лицензиялари бор. Ла Лига ўйинларини ҳам кузатиб борамиз, ҳар хил программалар орқали ўйинларини таҳлил қиламиз, статистикаларини ўрганамиз.

зокир4

“Реал”да тажриба ошириш имконияти берилади”

- “Реал” Мадридда тажриба ошириш имконияти берилади. Масалан, асосий жамоасида ёки администрация бошқарув тизимида. Агар амалиёт давомида ўзимни яхши кўрсатсам, бундай имкониятлар албатта бор. Бу диплом нафақат “Реал”да балки, Европанинг бошқа клубларида ҳам ишлаш имкониятини беради. Сабаби, бу Университетни битирганлар футбол билан боғлиқ катта-катта ташкилотларда ишлашади. ФИФА, Испания Ла Лигаси ёки “Реал” клубинининг ўзида ҳам ишлайдиганлар бор.

 

Фикрлар

Фикр қолдириш учун авторизациядан ўтинг!