Анчелотти: "Ғалабага лойиқ бўлган жамоага ютқаздик"

"Реал" Испания чемпионати доирасида шанба куни сафарда "Бетис"га 1:2 ҳисобида мағлуб бўлди. Учрашувдан сўнг Мадрид клуби бош мураббийи Карло Анчелотти ўз фикрларини билдирди.

"Ёмон ўйин. Дастлаб ҳаммаси яхши бошланди, аммо кейинчалик ўз даражамизни кўрсата олмадик. Тўп назоратини йўқотдик ва биздан яхшироқ ўйнаган, ғалабага лойиқ бўлган жамоага имкониятни бой бердик. 

Чемпионатда мағлубиятга учраш оғир зарба. Бунга жавоб қайтаришимиз керак. Мавсумнинг бу босқичида ютқазиш жуда қийин, аммо бугун яхши ўйин кўрсата олмадик. Айниқса, биринчи бўлимда кўп тўп йўқотдик, натижада "Бетис" ўйинга қайтиб олди." — деди Анчелотти матбуот анжуманида.

Энди "Реал" Чемпионлар Лигаси доирасида "Атлетико" билан бўладиган ўйинга тайёргарлик кўради. Учрашув сешанба куни бўлиб ўтади.