Анчелотти ички “душманлар” туфайли “Реал”дан кетадиган бўляпти

“Реал” бош мураббийи Карло Анчелотти жамоа унинг қўл остида Испания чемпионати ва Европа чемпионлар лигасида ғолиб чиққанига қарамай, муддатидан олдин клубни тарк этмоқчи.

Бу ҳақда The Athletic нашри хабар тарқатди.

Манбага кўра, 65 ёшли италиялик мутахассис келажаги ҳақида бош қотира бошлади. Анчелотти “Реал”даги  тўрт йиллик фаолияти давомида толиқиб қолганини рўкач қиляпти. Шунингдек, у клуб ичидан оммавий ахборот воситаларига турли хабарларни сиздираётган одамлар борлиги учун ҳам ёзда ишини топшириб юбормоқчи.

Анчадан бери “Реал” раҳбарияти Карло Анчелотти ўрнига “Байер”ни муваффақиятли бошқараётгаг Хаби Алонсони олиб келишни режалаштираётгани ҳақида маълумотлар тарқатилмоқда.

Кейинги пайтда “Реал”ни бошқаришга бошқа номзод –“Ливерпуль”даги узоқ фаолиятидан кейинўтган ёздан бери мураббийликдан дам олаётган Юрген Клоппни олиб келиш варианти ҳам пайдо бўлди.