"Андижон" - "Бунёдкор" ўйини олдидан. "Бургутлар" ҳали "Қалдирғочлар"ни ютмаган!

18 март куни “Андижон” жамоамиз Суперлиганинг 3-турида Тошкентнинг “Бунёдкор” клубини қабул қилади.

Хабарингиз бор, “Андижон”нинг уй ўйинлари ўтказиладиган “Бобур Арена” стадионида айни пайтда реконструкция ишлари олиб борилаётгани туфайли жамоамиз вақтинча Фарғонанинг “Истиқлол” стадионидан фойдаланиб туради.

“Андижон” – “Бунёдкор” қарама-қаршилиги олдидан одатга кўра икки жамоанинг шу пайтгача Суперлигадаги ўзаро ўйинлари тарихига назар ташламоқчимиз.

“Бургутлар” ҳамда “Қалдирғочлар” кучлилар орасида 24 марта тўқнашишди ва навбатдагиси 25-ўйинга айланади. Таассуфки, ҳозиргача жамоамизга “Бунёдкор”ни мағлуб этиш насиб қилгани йўқ. Жамоамиз фақат 6 та учрашувда дуранг натижа қайд этган. Қолган 18 та учрашувда “Бунёдкор” жамоасининг қўли баланд келган. Тўплар нисбати 8/47 “Бунёдкор” фойдасига.

“Андижон” клуби охирги бор 2020 йилги мавсумда “Бунёдкор” билан 0:0 ҳисобида дуранг қайд этган.

Эслатиб ўтамиз, мазкур ўйин 18 март куни соат 17:00 га белгиланган.

“Андижон” матбуот хизмати.