"Андижон" бу йил ҳисобидан Қаршида учинчи ўйинини ўтказади ёхуд "Аждарлар" ва "Бургутлар" тўқнашуви олдидан

Бу йил ҳисобидан "Андижон"нинг Қарши шаҳридаги учинчи ўйинига гувоҳ бўламиз. Бундан аввал икки марта “Қизилқум” клуби Қаршидаги “Марказий” стадионда номинал мезбон сифатида "Андижон" билан куч синашди. Аввалига чемпионат доирасида бўлиб ўтган учрашувда жанговар дуранг – 3:3 ҳисоби қайд этилган бўлса, кейинги тўқнашувда Ўзбекистон Кубоги чорак финалида Хомяков жамоаси рақибини ушбу стадионда 0:3 ҳисобида тор-мор келтирди. Бу сафар эса чемпионат доирасида “Насаф”га қарши майдонга тушишади.

Хабарингиз бўлса, “Андижон” “Насаф”га қарши ушбу мавсумнинг ўзида икки марта тўқнаш келишга улгурди. Биринчи даврада “Бобур арена”да бўлиб ўтган баҳсда 1:1 ҳисоби кузатилган. Кейинги ўйин эса Ўзбекистон Кубоги гуруҳ босқичининг 3-турида кузатилган. “Бобур арена”даги учрашувда Бектемир Абдуманнонов қўшиб берилган дақиқаларнинг охирида муҳим голни урган ва "Андижон" 1:0 ҳисобида ғолиб чиққан ҳолда Кубокдаги юришини давом эттирмоқда.

“Насаф” ва “Андижон” жамоалари миллий чемпионатда 45 бор куч синашишган. “Аждарлар”да 27, “Бургутлар”да эса 7 та ғалаба бор. 11 та ўйинда кучлар тенг келган. Тўплар нисбати 95х50 “Насаф” фойдасига.

Ўтган йили Қаршида бўлиб ўтган ўйинда “Андижон” чемпионатнинг 1-турида “Насаф”ни ягона гол эвазига мағлубиятга учратиб қайтган.