"Андижон" футболчиси: "Бизда ажойиб муҳит бор, барча футболчилар чемпион бўлишни хоҳлайди"

Андижонда бўлиб ўтган водий дербисида "Бургутлар" бу йил Суперлигада ҳали мағлубиятга учрамаган “Навбаҳор”ни йирик 3:0 ҳисобида таслим этди. Шу куни “Андижон”нинг барча футболчилари катта иштиёқ ва хоҳиш кўрсатишди, ғалаба учун борини беришди. Натижасини эса ўзингиз кўриб турибсиз.

Ёқимли ўйин ва ғалаба ҳақида жамоанинг ажойиб футболчиларидан бири, “Навбаҳор”га қарши муносиб тўп сурган Абдувоҳид Ғуломов муносабатини билдирди.

- Рости, кўпчилик “Андижон” – “Навбаҳор” учрашувида бундай натижани кутмаганди. Қолаверса, "Навбаҳор" ҳали ютқазмаганди ҳам. Айтинг-чи, кучли рақибга қарши бундай йирик ғалабанинг асосий омили нимада?

- Аввало, барча андижонликларни ва жонкуяр фан-клубни ажойиб ғалаба билан табриклайман. “Навбаҳор” жамоаси чемпионатда ҳали мағлубиятга учрамаганини билардик. Биз биринчи бўлиб мағлубиятга учратишни жуда хоҳладик ва Худо насиб қилди. Буни чиройи тарзда уддаладик.

- Албатта, баҳсдан аввал турли хил экпертлар "Андижон"нинг имкониятини паст баҳоладилар. Матбуот анжуманида Петросян ҳам шунга тўхталди. Бундай ўйин ва натижадан кейин уларга нима деган бўлардингиз?

- Экспертлар фикрини ўзим ҳам ўқидим, эшитдим. Ҳақиқатан уларнинг деярли барчаси “Навбаҳор”нинг ғалабасини таъкидлаб ўтишди. Лекин бундай дербида ўйин қайси майдонда бўлиши ва таркиблар ҳам четга чиқади. Фақат ғалаба учун жанг бўлади. Шу куни ким кўпроқ тайёр бўлса, ғалабани илиб кетади. Бизни В режаси йўқ деганларга А режани ўзи етарли бўлди.

- Бош мураббий Хомяков дисквалификация боис охирги ўйинларда захира ўриндиғида эмасди. Бу ҳол ўйинчиларга қандай таъсир қиляпти?

- Бош мураббийимиз биз билан бирга ва тез орада захира ўриндиғига ҳам қайтади.

- Биринчи давра якунига етди. "Андижон" учун мавсумнинг биринчи ярмини қандай баҳолаган бўлардингиз?

- Биринчи даврани ёмон ўтказдик, дея олмайман. Иккинчи даврада кўпроқ ҳаракат қилиб, бундан яхши натижа қайд этишга ҳаракат қиламиз.

- Жамоада ўзгача мотивация бор. Агар шу руҳда ўйин кўрсатса "Андижон" бемалол совринли ўринлар учун кураша олади ёки ҳаммаси шунга қараб кетяпти, деб ўйлайсизми?

- Жамоада ажойиб муҳит бор. Менимча, барча футболчилар чемпион бўлишни хоҳлайди. Биз ҳам биринчи ўрин учун бор кучимиз билан ҳаракат қиламиз. Худо хоҳласа, бунга эришамиз.