"Андижон" клуби таътилга чиқишдан олдин қарздорликни тўлиқ бартараф этди

“Про лига-2022” мавсуми расман ниҳоясига етди. Унда “Андижон” жамоамиз муваффақиятли иштирок этган ҳолда муддатидан илгари 1-ўринни эгаллади ва натижада про лига ғолиби сифатида Суперлига чиптасини қўлга киритди.

Кеча мавсумдаги сўнгги ўйинини ўтказган “Андижон” жамоамиз таътилга чиқди.

Энг асосийси, барча жамоа аъзоларининг оила даврасига янада яхши кайфиятда қайтишлиги учун ойлик маош ва мукофот пуллари билан боғлиқ ҳисоб-китоб ишлари бартараф этилди. Ҳаттоки, шартномаларнинг 30 ноябргача тузилганлари ҳам бўлиб, ушбу ой учун ҳам иш ҳақлари тўлиқ ўз эгаларига топширилди.

Кеча ўйиндан кейин “Андижон” клуби бош директори Улуғбек Мирзаев клубнинг таътилга чиқишидан олдин мураббийлар ва футболчиларга ажойиб мавсумни ўтказиб, мухлисларни хурсанд қила олгани учун миннатдорчилигини билдирди. Айниқса, легионер футболчиларга ҳам алоҳида ташаккурини изҳор қилиб ўтди.

Шуни алоҳида айтиш ўринлики, клубдаги барча мураббий ҳамда футболчилар билан ҳисоб-китоб ишлари бартараф этилиб, янги мавсумга қарздорликсиз кирилишида ва жамоани кучайтириш учун таклиф қилинадиган футболчилар билан музокараларнинг олиб борилишида бу ҳолат муҳим роль ўйнайди.

"Андижон" матбуот хизмати.