"Андижон" "Мавсум-2023" учун тайёргарликни бошлади. Таркибда янгилар бор
“Андижон” жамоаси “Мавсум-2023” учун тайёргарлик босқичини 15 декабрдан бошлади. Янги бош мураббий Александр Хомяков бошчилигида жамоамиз аъзолари ўз қароргоҳида машғулотларга киришишди.
Илк йиғинда жорий чемпионатда тўп сурган футболчилар, ижарада ҳаракат қилган ўйинчилар ва U-19 биринчилигида мусобақа жадвалида 3-ўринни эгаллаган “Андижон” U-19 таркибидан бир қатор иқтидорли ёшлар машғулотларга жалб этилишган.
Булардан ташқари, ўқув-машғулот йиғинларида икки нафар янги футболчилар ҳам кўриниш берди. Жумладан, Тожикистоннинг “Хўжанд” жамоаси шарафини ҳимоя қилган ака-ука Самандар ва Муҳаммад Очилов жамоамиз машғулотларида иштирок этмоқдалар. Ушбу ҳимоячилар ҳам мураббийлар штабида яхши таассурот қолдириш учун йиғинларда астойдил ҳаракат қилишни бошлаб юборишди.
Жамоамизнинг дастлабки тайёргарлик режаси 15-28 декабрь кунларини ўз ичига олади. Ўқув-машғулот йиғинимизнинг якунида ўртоқлик учрашуви ўтказилиши режалаштирилган.
“Андижон” матбуот хизмати.
Фикрлар