"Андижон" қандай қилиб сўнгги дақиқаларда ғалабани илиб кетяпти? Барчаси тасодифми ёки... ёхуд жамоа халоскорига айланаётган Шаҳбоз Эркинов нима дейди?

Виктор Кумиков шогирдлари – “Андижон” клуби кетма-кет учинчи ғалабасини тантана қилди. Про лиганинг бу йилги мавсумида шиддат шу қадар кучлики, осон ўйин ва осон ғалаба ҳақида ўйлаш хомхаёл. Суперлигага қайтиш учун асосий фаворитлардан бири ҳисобланган “Андижон” ғалабаларини қанчалик машаққат билан қўлга киритаётганини кўряпмиз. Охирги учта турда қўшиб берилган дақиқаларда гол уриб, ғалабани илиб кетяпти. Натижада “Андижон тайм” ибораси пайдо бўлди. Бунинг муаллифи таниқли шарҳловчи Хайрулла Ҳамидов.

“Бургутлар”нинг асосий ҳужумчиларидан Шаҳбоз Эркинов ўзига юклатилган ишончни оқлаяпти. “Шўртан”га қарши баҳсда ўйин тақдирини ҳал қилувчи голни урди. Ундан аввал ҳам Эркинов “Машъал” дарвозасига гол урган ва голга ассистентлик ҳам қилган. Ҳозиргача Шаҳбоз про лига чемпионатида 5 та тўп киритишга эришди. “Шўртан” билан ўтказилган беллашувдан кейин Эркинов бир қатор саволларга жавоб қайтарди.  

- “Андижон” клуби сафарда жуда қимматли ғалабани қўлга киритди. “Шўртан”га қарши беллашув борасида қандай хулосаларга эга бўлдингиз?

- Афсуски, ўзимиз истаганчалик яхши ўйнай олмадик. Айниқса, биринчи бўлимда ёмон ўйин кўрсатдик. Иккинчи бўлимда бироз ўзимизга келдик. Йўқотадиганларимизни бошида йўқотиб бўлганмиз. “Зомин”, “Хоразм” ва “Ғиждувон” билан учрашувларда очколаримизни бой бердик. Турнир жадвалида рақобат ҳам жиддий тус олган. Ҳар бир йўқотилган очко қимматга тушади. Хато қилишга ҳаққимиз йўқ. Футболчилар масъулиятни яхшироқ ҳис қилишди ва иккинчи бўлимда ҳужумкор ўйнадик. Биринчи бўлимда рақибга бўш ҳудудларни кўпайтириб юбордик. Аслида тактик услубимиз шунақа эди, аммо бу даражада эмасди. Мураббий бизга орқароқда ўйнанглар, деб айтмаганди. Кўрсатаётган ўйинимиз ҳеч кимни қониқтирмаётганди, шу сабабли барчамиз бундан қониқмасдан, тезроқ ўйинимизни кучайтириш ҳақида ўйлаётгандик. Худога шукр, юзимиз ёруғ бўлди. Охирги пайтларда омад биз томонда бўляпти, охирги дақиқаларда гол уриб ютиб кетяпмиз. Тўғри, бу охиригача курашганимиз сабабидан ҳам бўляпти. Аммо ҳар доим ҳам охиригача курашганингизда омад бундай келавермайди.

- “Шўртан” билан ўйин 0:0 ҳисоби билан тугайдигандек бўлиб турганди. Шахсан ўзингизда ҳам гол уришингизга ишонч бормиди ёки...

- Нафақат ўзимда, балки бутун жамоамизда ғалабага ишончимиз бор эди. Хотиржамроқ эдик, ҳеч биримиз ваҳимага тушиб қолганимиз йўқ. Балки охирги дақиқаларда яна гол уришимизга ўзимизни ўзимиз ўргатиб қўйгандирмиз. Шу боис ўйинда хотиржамроқ эдик. Бундан кейин ҳам охиригача курашамиз. Айнан мен гол ураман деб ўйламадим. Голни ким уришининг фарқи йўқ эди, асосийси, ютсак бўлгани. Бизга уч очко керак эди. Кейинги турда “Бухоро”ни қабул қиламиз. Бу жамоа ҳам юқорида. Мусобақа жадвалида барча клублар зич жойлашган. “Шўртан”ни ютмасак ҳам бўлмасди. Нега деганда, 800 километр йўл босиб Андижондан мухлисларимиз келганди, улар учун ўйнамасак уят бўларди. Шунинг учун ҳам биз жонимизни бериб охиригача курашдик.

- Учта учрашувдан бери “Андижон” 90-дақиқадан кейин гол уриб ғалаба қозоняпти. Бу борада кўпчилик томонидан қизиқ фикрлар билдириляпти. Айниқса, “Андижон тайм” ибораси анча оммалашиб кетди. Умуман, бу ҳолат сизнингча, нима билан боғлиқ?

- Фикримча, бу аввало охиригача курашаётганимиз билан боғлиқ. Охиригача курашишимиз учун эса бизнинг жисмоний тайёргарлигимиз ҳам қўл келяпти. Кучимиз борлиги боис сўнгги сонияларда гол уряпмиз. Бошқа клубларни эса кучи етмай қолаётганидан охирги дақиқаларга келиб чарчаб қоляпти. Демак, бизни ҳолатимиз яхши даражада. Мен ҳам ҳар хил нарсаларни ўқияпман. Атайлаб қилишяпти, тактика шунга қаратилган, деган маънода. Ким хоҳлайди бундай тактика қилиб, хавотир устида ўтиришни?! Энг асосийси, жисмоний тайёргарлигимиз яхшилиги ва сўнгги дақиқагача курашишимиз қўл келяпти. “Турон” билан “Машъал”га қарши учрашувларда мухлисларимизнинг фаоллигини алоҳида айтишим керак. “Шўртан” билан ўйиндан олдин уларни стадионда кўриб ҳайрон қолдим. 800 километр йўл босиб келишган. Биз яна уйимизда ўйнагандек ўйнадик. Мухлисларни далдаси ҳам бизга катта туртки беряпти. Футбол ўзи шулар учун ўйналади.

- “Бухоро” билан бўлажак баҳс олдидан нимани айта оласиз?

- Ўз майдонимизда ўйнаймиз. Бу баҳсга ортиқча гап-сўз ҳам шарт эмас. Суперлигага чиқиш учун мақсади бор клублар тўқнаш келади, бир-бири учун рақобатчилар. Албатта, зўр ўйин бўлади, деб ўйлайман. Кучли жамоа ютади ва Худо хоҳласа, ўша кучли жамоа биз бўламиз. Мухлисларимизнинг қўллаб-қувватлаши эса жамоамизга яна асқотади.