"Андижон" сафида кимлар Ўзбекистон Кубогини ютган?

Хабарингиз бор, айни чоғда “Андижон” Ўзбекистон Сoca-Cola Кубоги 1\4 финалида АГМКга қарши ўйин учун жиддий тайёргарлик кўрмоқда. Ютган жамоа ўз-ўзидан ярим финалга чиқади. “Андижон” шу пайтгача чорак финалларда ўйнаган-у, бироқ ҳали ярим финалга чиқмаган. Шунинг учун Виктор Кумиков жамоаси бу сафар ёқимсиз анъанага чек қўйиш учун астойдил курашади.

Шу ўринда савол туғилади: “Андижон” гарчи Кубок баҳсларида охиригача бора олмаган бўлса-да, таркибидаги футболчилар орасида Кубокни ютган ва бунинг масъулияти қандайлигини ҳис қилиб кўрганлар борми? Албатта, бор. Жамоамиз сафида Ўзбекистон Кубогини боши узра кўтарганлар тўп суришяпти.

Жумладан, тажрибали ҳужумчи Шаҳбоз Эркинов 2007 йили “Пахтакор” сафида ушбу совринни қўлга киритган. Финалда ўша пайтдаги “Қурувчи” пенальтилар сериясида таслим этилган. Эркинов эса “Пахтакор” футболчиси эди.

Шунингдек, 2018 йили Фарғонада АГМК “Пахтакор”га қарши Кубок финалида ўйнаган ва унда олмалиқликлар сенсацион тарзда рақибини 3:1 ҳисобида мағлубиятга учратганини яхши билсангиз керак. Бизнинг ҳозирги таркибимиздан нақд 4 нафар футболчи ўша финалда АГМК сафида майдонга тушган ҳамда “Пахтакор”ни мағлуб этиб, Кубок қўлга киритилишида катта ҳисса қўшишган.

Ўша финалда Владимир Бубанья ва Азамат Исроилов асосий таркибда тўлиқ тўп суришган. Зафар Полвонов захирадан майдонга туширилган. Қолаверса, дарвозабон Хуршид Ходжаев энди жароҳатидан фориғ бўлиб, ушбу ўйинда АГМКнинг захира ўриндиғидан жой олганди.

Айнан юқоридаги ўйинчилар Ўзбекистон Кубогини қўлга киритишган. “Андижон” клуби ҳам Кубокда ўз омадини синаб кўрмоқда ва бу йўлда Кубокни ютган ўйинчиларимизнинг тўплаган тажрибалари ҳам асқотади, деган умиддамиз. Жамоамизга муҳим баҳсда омад тилаб қоламиз.

Барча мухлисларни 3 сентябрь куни бўлиб ўтадиган муҳим учрашувга таклиф қиламиз. Зеро, мухлисларимизнинг қўллаб-қувватлаши жамоамизга катта далда бўлиши аниқ.

“Андижон” матбуот хизмати.