"Андижон" Тожикистон терма жамоаси ҳужумчиси билан 3 йиллик шартнома имзолади

Қишки селекция ишларини изчиллик билан давом эттираётган "Андижон" режага биноан керакли позицияларга керакли ўйинчиларни таклиф қилди ва охирги пайтларда ҳужум чизиғини кучайтириш мақсадида янги футболчилар жалб этилаётганидан хабардорсиз. Бунга қадар олдинги чизиқ вакиллари сифатида Рустам Турдимуродов ҳамда россиялик Лука Згурскийнинг трансферлари эълон қилинди.

Бу ҳали ҳаммаси эмасди. Жамоа мухлислари учун яна бир хушхабар шундан иборатки, клуб сафига яна бир янги легионер ҳужумчи қўшилди. Тожикистон миллий терма жамоаси аъзоси ҳисобланган Шахрам Самиев билан расман шартнома имзоланди. Келишув муддати 3 йилга мўлжалланган.

Маълумот учун, Самиев 2001 йилнинг 8 февраль куни таваллуд топган. Унинг охирги клуби Молдованинг “Милсами” жамоаси ҳисобланади.Шахрам фаолиятини Тожикистонда бошлаган. Дастлаб “Баркчи”, кейин ЦСКА (Душанбе)да ўйнади. Сўнгра, 2019 йили “Истиқлол”га кўчиб ўтди. Шундан сўнг Шахрам Самиев Россиянинг “Рубин” клуби аъзосига айланди. Тожикистонлик ҳужумчининг кейинги манзили Молдова чемпионати бўлди. У ерда “Шериф”, “Динамо-Авто”, “Зимбру” ва “Милсами” шарафини ҳимоя қилди. Бундан ташқари, Беларусь чемпионатида “Торпедо-Жодино” ва “Ислочь” клубларида ҳам тўп сурган.

Шахрам Тожикистоннинг турли ёшдаги термаларида ҳам ўйнаган ва ҳозирда у миллий терма жамоанинг муҳим футболчиларидан бири ҳисобланади. Самиев Тожикистон термасида ҳозирга қадар 27 та учрашувда 7 та гол урди. Яқинда Қатарда бўлиб ўтган Осиё Кубогида Самиев Тожикистон терма жамоаси шарафини ҳимоя қилди.

“Андижон” матбуот хизмати.