Андижондаги ММА кечаси қандай ўтди? Ташкилотчилар жавоб берди

Куни кеча, Андижон шаҳри профессионал ММА кечасига мезбонлик қилди. Ҳоким кубоги турнири, деб номланган ушбу турнир юқори даражада ўтди, десак муболаға бўлмайди. Тўғри, камчиликлар ҳам йўқ эмас, лекин иш бор жойда, албатта, кичик бўлса-да, бундай ҳолатлар учрайди.

Биз мазкур турнир якуни борасида ташкилотчилар ва мураббийларнинг фикри билан қизиқдик.

Жаҳонгир Қорабоев – Андижон ММА терма жамоаси бош мураббийи

- Ўйлайманки, барчаси яхши ўтди. Бунинг учун Андижон вилояти ҳокими, Ўзбекистон ММА ассоциацияси Андижон вилояти бўлими раиси Шуҳрат Абдураҳмоновга ўз миннатдорлигимизни билдириб қоламиз. Иштирокчилар муносиб рағбатлантирилди. Шунингдек, Ўзбекистон ММА ассоциацияси раиси ўринбосари Мурод Хонтўраевга ҳам ўзига хос совғалари учун ташаккур айтамиз. Қисқа қилиб айтганда, шогирдларимиз ўзларига билдирилган ишончни оқлай олдилар. Насиб қилса, янада яхши натижаларни қайд этамиз.

Фаррух Мадаминов – Андижон ММА терма жамоаси мураббийи

Яхши жанглар бўлди. Устоз Жаҳонгир Қорабоев кўрсатмалари остида шогирдларни жиддий тайёрлашга ҳаракат қилдик. Шукрки, натижалар ёмон бўлмади. Албатта, бу бошланиши ҳали, нафақат юртимизда балки, хориждаги турнирларда ҳам шогирдларимиз яхши иштирок этиб, юртимиз шаънини муносиб ҳимоя қилишади ва тез орада нуфузли промоушенларда ҳам ўзларини кўрсата олади.

Мирзоҳид Атабоев – ташкилотчи, кикбоксинг бўйича Осиё ва жаҳон чемпиони

- Ушбу турнирни яхши савияда ўтказишга ҳаракат қилдик. Менимча, биз ўйлагандан ҳам зиёда тарзда ўтди. Тўғри жузъий камчиликлар ҳам бўлди. Бироқ, бу жанг кечасининг савиясига ҳеч қандай таъсир кўрсатгани йўқ. Турнирнинг эртаси куни вилоят ҳокими барча ташкилотчилар, мураббий ва спортчиларни ҳузурига таклиф этиб, ўз миннатдорчилигини билдирди. Қолаверса, меҳмонлар ҳам яхши кайфиятда ўз юртларига жўнаб кетишди. ММА юртимизда янги спорт тури ҳисобланади. Тўғри, авваллари фақатгина чет мамлакатларга чиқиб, жанг ўтказишган. Юртимизда эса, бундай жанг кечалари бўлмасди. Мана аста-секин жаҳон тан олаётган ушбу йўналиш ҳам юртимизда оммавийлашиб бормоқда. Бу турнир вилоятимиздаги илк қадам бўлди. Насиб қилса, навбатдагилари янада юқори даражада бўлади, деб ўйлайман. Бунинг учун барча аҳил ва иноқ ҳамда бир мушт бўлсак, барчаси ажойиб кўриниш олади.

Нозимжон Тўйчиев – Ўзбекистон ММА ассоциацияси Андижон вилояти бўлими раиси ўринбосари, бош ташкилотчи

- Энди, камчиликлар бўлмади эмас, бўлди. Лекин бундай ҳолатлар илк турниримизда рўй бергани ҳам яхши. Чунки, навбатдагиларида бартараф этиб, янада идеал даражада ўтказишга ҳаракат қиламиз. Лекин, умумий тарзда олиб қараганда, яхши тадбир бўлди. Буни кўпчилик эътироф этмоқда. Албатта, четдагиларга яхши кўринади. Уларнинг ижобий таассуротлари эса бизга янада яхши ишлашимизга туртки бўлади. Шу ўринда, турнирнинг ўтказишимизда бизга яқиндан ёрдам берганларнинг барчасига ўз миннатдорлигимни билдириб қоламан.