"Андижон"га "Пахтакор"ни мағлуб этиш учун биргина гол етарли бўлди ёхуд "Бургутлар"нинг ёзги йиғини тугади

“Андижон” Тошкентдаги ёзги йиғинини “Пахтакор” марказий стадионида мезбонларга қарши ўйин билан якунлади. Бу “Бургутлар”нинг пойтахтдаги охирги назорат учрашуви эди. Иккала жамоа устозлари – Максим Шацких ҳам, Александр Хомяков ҳам ўйинни жанговар таркиб билан бошладилар.

Айтиш керакки, бу ўртоқлик беллашуви бўлишига қарамай анча қизиқарли ва ҳужумкор руҳда ўтди. Айниқса, голли имкониятларни яратишда “Андижон” бир мунча фаолроқ бўлди. Ўйин бошларида Фарҳод Бекмуратовда стандарт вазиятдан кейин имконият бўлди. Кейин эса “Андижон” дарвозабони Элдор Адҳамов сейвини намойиш қилди.

Ўйиндаги ягона гол танаффусдан кейин киритилди. “Андижон”нинг хавфли ҳужумларидан бирини тажрибали ярим ҳимоячи Фарҳод Бекмуратов жарима майдони ташқарисидан ўзининг аниқ ва кучли зарбаси билан голга айлантиришнинг уддасидан чиқди. Кейинги дақиқалардаги ҳужумларда ҳам яна “Бургутлар”да вазиятлар бўлди. Жумладан, Шахром Самиевда иккита қулай имконият бор эди. Улардан бирида йўллаган зарбаси дарвоза устунига тегиб қайтди.

Учрашувда 0:1 ҳисоби сақланиб қолди ва “Андижон” назорат ўйинида амалдаги чемпион  “Пахтакор”ни мағлубиятга учратди. Шу тариқа, жамоанинг Тошкентдаги йиғини ўз ниҳоясига етди.

У ерда ҳаммаси бўлиб 3 та ўртоқлик ўйини ўтказилди.

“Андижон” – “Арал” – 5:0

“Андижон” – “Қизилқум” – 2:2

“Пахтакор” – “Андижон” – 0:1

Кўриб турганингиздек, ушбу учрашувларда “Андижон” рақиблар дарвозасига 8 та гол урди ва 2 та ўтказиб юборди. Киритилган 8 та голдан 2 таси Фарҳод Бекмуратовга тегишли бўлди. Яъни, у иккита учрашувда ўз ҳисобига биттадан гол ёзиб қўйди. Шунингдек, Саидмурод Каримов, Абинур Нуримбет, Лука Згурский, Бектемир Абдуманнонов, Вагиз Галиулин ва Рустам Турдимуродов ҳам гол муалифларига айландилар.

“Андижон” футболчиларига қисқа муддатли дам берилди. Энди 28 июлдан ўз қароргоҳида иккинчи давранинг илк туридаги ўйин – ОКМКга қарши баҳс учун тайёргарликни олиб борадилар.  

“Пахтакор” – “Андижон” – 0:1 (0:0).

24 июль. Тошкент. “Пахтакор” марказий стадиони.

Бош ҳакам: Аскер Нажафалиев

Қанот ҳакамлари: Руслан Серазтединов, Амир Галеев.

“Пахтакор”: Никита Шевченко, Хожиакбар Алижонов, Шахзод Азмиддинов, Абддулла Абдуллаев, Муҳаммадрасул Абдумажидов, Сардор Собирхўжаев, Киммих Мерк, Достон Ҳамдамов, Дониёр Абдуманнопов, Улуғбек Ҳошимов, Умар Адҳамзода.

Захирадан майдонга тушганлар: Отабек Боймуродов, Павел Павлюченко, Дилшод Саитов, Ойбек Ортиқбоев, Анваров, Бехруз Ўктамов, Муҳаммадов, Муҳаммадали Усмонов, Отабек Жўрақўзиев, Пўлатхўжа Холдорхонов.

“Андижон”: Элдор Адхамов, Илдар Маматказин, Владимир Бубанья, Илҳом Алижонов, Абдураҳмон Комилов, Фарҳод Бекмуратов, Муҳаммадкарим Тоиров, Илҳом Абдуғаниев, Вагиз Галиулин, Фарҳод Соҳибжонов, Шахром Самиев.

Захирадан майдонга тушганлар: Игорь Литовка, Сардор Азимов, Ислом Маматказин, Абдулвоҳид Ғуломов, Абинур Нуримбет, Леван Арвеладзе, Лука Згурский, Шохжаҳон Ёрқинбоев.

Гол: Фарҳод Бекмуратов.