"Андижон"га хориждан дарвозабон келадими?

Андижонликлар Янгиер ва Тошкентдаги йиғиндан сўнг энди Фарғонада «Ҳоким Кубоги»да иштирок этишяпти ва бу ҳам жамоанинг тайёргарлик режасининг бир бўлаги ҳисобланади. Шу йўл орқали бош мураббий Александр Хомяков жамоасининг ўйинини шакллантиришга ҳаракат қилмоқчи. Лекин шунга яраша таркиб ҳам етарли ўйинчилар билан тўлдирилиши зарур. Ҳозирда эса клубда селекция ишлари давом этмоқда. Натижада жамоада келди-кетдилар давом этмоқда.

Жумладан, яқинда хабар бериб ўтилганидек, ўтган мавсумнинг иккинчи даврасида «Навбаҳор»да тўп сурган иқтидорли футболчи Нодир Мавлонов яна «Андижон»га қайтган. Ёдингизда бўлса, ушбу ўйинчи 2018 йили «Андижон» таркибида тўп сурган ва жамоанинг Суперлигага йўл олишида катта ҳисса қўшганди. Шу тариқа, Мавлонов янги мавсумни яна «Андижон»да бошлайдиган бўлиб турибди. Шунингдек, ўтган мавсумда «Қўқон-1912» жамоасида ўйнаган ҳужумчи Темур Усмонов ҳам «Андижон»дан тушган таклифни қабул қилди. Айтиш жоизки, Усмонов ўтган йили қўқонликлар сафида 8 та учрашувда майдонга тушди, лекин рақиблар дарвозасига гол ура олгани йўқ. Мураббийлар эса «Андижон»да унга имконият беришмоқчи.

Шу билан бирга клубни яна иккита ўйинчи тарк этди. Ярим ҳимоячи Роббим Ҳасанов айни пайтда Фарғонанинг «Истиқлол» жамоасида шуғулланмоқда. Ҳозирда эса у «Истиқлол» билан бирга Фарғонада «Ҳоким Кубоги»да қатнашмоқда. Шунингдек, яна бир ярим ҳимоячи Дониёр Исмоилов ҳам «Андижон» билан хайрлашди. Ҳужумчи Даврон Исоқов эса «Турон» жамоасининг машғулотларига қўшилган. Ҳозирда эса мураббийларни дарвозабон муаммоси ҳам ўйлантирмоқда. Маълум бўлишича, айрим легионер посбонларнинг номзодларини ўрганиб чиқмоқдалар ва тез орада янги дарвозабон таркибга қўшилиши кутилмоқда.