Андрес Иньестанинг мураббийлик фаолиятидаги илк клуби номи маълум бўлди

“Барселона” клуби ва Испания терма жамоасининг собиқ футболчиси Андрес Иньеста БААнинг “Галф Юнайтед” клуби бош мураббийига айланади. Бу ҳақда журналист ва инсайдер Фабрицио Романо X ижтимоий тармоғида хабар берди.

Манба маълумотига кўра, томонлар ҳамкорлик шартлари бўйича келишувга эришган ва яқин вақт ичида бу расман тасдиқланади.

Футболчилик фаолияти давомида Андрес Иньеста “Барселона” сафида тўққиз марта Испания чемпиони бўлган, шунингдек олтитадан мамлакат кубоги ва Суперкубогини қўлга киритган.

Халқаро майдонда у каталонияликлар билан тўрт марта Чемпионлар лигаси, икки марта УЕФА Суперкубоги ва уч марта клублар ўртасидаги жаҳон чемпионатида ғолиб чиққан.

Шунингдек, ярим ҳимоячи “Виссел Кобе” ва “Эмирейтс” клубларида ҳам тўп сурган.

Иньеста Испания терма жамоаси билан  жаҳон чемпионати ва икки марта Европа чемпионатида ғолиб бўлган.

“Галф Юнайтед” ҳозирда БАА чемпионатининг иккинчи дивизионида иштирок этмоқда ва жамоа айни пайтда турнир жадвалида 10-ўринни эгаллаб турибди.