Andro Giorgadze: “Yakunlanayotgan yildek bir oila bo‘la olsak, keyingi mavsumda ham yaxshi natijalarga erisha olamiz”

Yakunlangan mavsumda "Qo‘qon-1912" jamoasining g‘alabalarida o‘z hissasini qo‘shgan Andro Giorgadze qisqa intervyu berdi.

“Qo‘qon-1912” jamoasidagi ilk mavsumingiz haqida nima deya olasiz? “Mash’al” bilan “Qo‘qon-1912” jamoasi o‘rtasida qanday farqlarni sezdingiz?

- Jamoamiz oldiga yil boshida 1-o‘rin bilan Superliga yo‘llanmasini qo‘lga kiritish vazifasi qo‘yilgandi. Shunga qaramasdan vazifani bajardik. Shu yo‘lni bosib o‘tishimiz kerak bo‘lgan ekan va biz pley-off orqali elitaga qayta oldik. Yil davomida og‘ir va yaxshi kunlarimiz bo‘ldik, biz bu yo‘lda bir jamoa bo‘lib barchasidan o‘tdik deb o‘ylayman. Yakunlanayotgan yildek bir oila bo‘la olsak, keyingi mavsumda ham yaxshi natijalarga erisha olamiz.

“Qo‘qon-1912” va “Mash’al” o‘rtasida farq katta. Biroq aniq sabablarni aytmagan bo‘lardim. Chunki sobiq klubimni hurmat qilaman va ular haqida gapirish noto‘g‘ri bo‘lsa kerak.

Umuman olganda, joriy mavsumdagi o‘yiningizdan qanchalik qoniqdingiz?

- Mavsum davomidagi o‘yinimdan juda qoniqdim deb aytmagan bo‘lardim, biroq “Qo‘qon-1912” jamoasini Superliga yo‘l olishda yordam bera oldim deb o‘ylayman. Oldimizga qo‘yilgan vazifani bajara oldik. O‘zimdan 100 foiz qoniqish hosil qilmadim. Biroq xudo xohlasa, keyingi mavsumda o‘zimning o‘yinimdan 200 foiz qoniqish hosil qilishga harakat qilaman.

Bu yilgi chempionat o‘tgan yilgidan nimasi bilan farq qildi?

- Bu yilgi chempionatda kuchsiz jamoaning o‘zi yo‘q edi. Oson o‘yinlar bo‘lmadi. 2023-yilgi mavsum bu yilgisidan kuchsizroq edi deb o‘ylayman. Bu yilgi jamoalarning saviyasi ancha baland edi.

Yangi mavsumda “Qo‘qon-1912” jamoasi bilan Superligada o‘ynaysiz. Yangi mavsumdan nimalarni kutyapsiz?

Yangi mavsumdan barcha jamoalardan yaxshi o‘yinlar kutib qolaman. Barchasi ajoyib bo‘lishiga umid qilaman. Yangi mavsumda “Qo‘qon-1912” jamoasi barcha jamoalarga qarshi raqobatdosh jamoa bo‘lishi uchun harakat qilamiz. “Qo‘qon-1912” jamoasi bilan uzoq yillar davomida Superligada o‘ynashni istayman.

Yil davomida jamoamizni qo‘llab turgan barcha qo‘qonlik muxlislarga minnatdorchilik bildiraman. Yil davomida ular bizni respublikasining qaysi viloyati bo‘lishimizga qaramasdan qo‘llab-quvvatlashga harakat qilishdi.