"Anfa" стадионида крикет бўйича Ўзбекистон очиқ чемпионати ўтказилмоқда

Мамлакатимизда крикет спорт турини кенг ривожлантириш борасида Ўзбекистон крикет федерацияси томонидан жадаллик билан ишлар олиб борилмоқда.

Ўсмирлар, ёшлар ва катталардан иборат жамоалар ўртасида ўтказилаётган турли мусобақалар эса крикет спорт турини аҳоли орасида оммавийлигини таъминлашга хизмат қилмоқда. Хусусан, жорий йилнинг 18 июнь куни Қибрай туманидаги "Anfa" халқаро крикет стадионида крикет федерацияси томонидан T20 форматдаги биринчи мавсум Ўзбекистон очиқ чемпионати бошланди.

Мазкур очиқ чемпионатда Тошкентнинг "Анфа", "Indian Cricet Tashkent Club", "Tashkent super kings", "Tashkent stars", Қашқадарё вилоятининг "Barlos"ҳамда Фарғонанинг "Fergana Rangers"дан иборат олтита жамоаси ўзаро беллашишмоқда. 18 июнь куни шунингдек, чемпионатнинг тантанали очилиш маросими ҳам ташкил этилди. Маросимда Ўзбекистон крикет федерацияси раиси Азиз Михлиев иштирок этиб, жамоаларни биринчи мавсум бошланиши билан қутлаб, уларга юқори ўринларни эгаллашлари учун омад тилади.
Таъкидлаш лозим, ушбу очиқ чемпионат миллий терма жамоага саралаш вазифасини ҳам ўтаб беради.
Чемпионат 25 июнга қадар давом этади.
                                                                                                                                Илҳом РАҲМОНОВ тайёрлади.