Англия грандлари қимматбаҳо юлдузни кутяпти

Бундеслиганинг кучли клубларидан ҳисобланган “РБ Лейпциг”нинг 19 ёшли қанот ҳужумчиси Ян Диоманде Англия Премьер-лигаси клублари эътиборини тортмоқда.

Ивуарлик иқтидор эгасига “Манчестер Сити”, “Ливерпуль”, “Тоттенхэм” ва “Челси” каби қудратли жамоалар жиддий қизиқиш билдиряпти.

Бу ҳақда журналист Флориан Плеттенберг Х ижтимоий тармоғидаги саҳифасида хабар қилди.

Шунга қарамай, ҳозирча бирон клуб ҳамкорлик масаласида немис клубига расмий таклиф билан мурожаат қилгани йўқ. Улар трансфер учун турли вариантларни ўрганиб чиқяпти.

Диоманденинг “РБ Лейпциг” билан шартномаси 2030 йилгача амал қилади ва унда бадал пули миқдори ҳақида ҳеч қандай банди мавжуд эмас.

Трансфер бўйича экспертларнинг таъкидлашича, бу савдо 2026 йилги жаҳон чемпионатидан кейин амалга ошиши мумкин. Шу билан бирга, “Лейпциг” янги юлдуз учун харидор клублардан 100 миллион евродан кам бўлмаган сумма талаб қилиш ниятида.