Англия клублари Чемпионлар лигасида 100 фоиз натижа қайд этди

Жорий мавсумда Англиянинг 6 та жамоаси УЕФА Чемпионлар лигасида иштирок этмоқда.  Қўшимча йўлланмани АПЛ ўтган мавсумги рейтинг натижалари орқали қўлга киритган бўлса, "Тоттенхэм" Европа лигасидаги ғалабаси туфайли Европанинг энг нуфузли мусобақасига чиқиш ҳуқуқини қўлга киритди.

Қизиғи шундаки, Премьер-лиганинг барча олти вакили умумий босқич якунланишига бир тур қолганидаёқ Чемпионлар лигаси плей-оффига чиқишни кафолатлади. "Арсенал", "Ливерпуль", "Тоттенхэм", "Ньюкасл", "Челси" ва "Манчестер Сити" турнирда иштирокини давом эттиради.

Қайд этиш жоиз, "Арсенал" аллақачон тўғридан-тўғри 1/8 финалга йўл олган. Қолган АПЛ жамоалари эса ҳозирча плей-оффнинг саралаш  босқичига чиқишни таъминлади.

Маълумот учун, айни пайтда турнирнинг кейинги босқичига чиққан жамоалар сони 15 тани ташкил этмоқда.