Антони қандай қилиб бир ўлимдан омон қолганини айтиб берди

"Манчестер Юнайтед"нинг бразилиялик вингери ва ҳозирда ижара асосида "Бетис" да тўп тепаётган Антони  "Movistar+" платформасига интервю берди. Унинг айтишича, у 7 ойлигида туғилган ва шифокорлар фақат уни ёки онасини сақлаб қолиши мумкин эди.

"Камтарлик - бу одамларда менга ёқадиган энг яхши ҳислат. Ҳаммаси қийин бўлишига қарамай, ота-онам менга доим тўғри йўлни кўрсатишди. Мен жуда қатъиятли ва орзуларим учун қаттиқ курашадиган одамман.

Мен муддатидан олдин 7 ойлигимда туғилганман. Шифокорлар она ёки боладан бирини танлаш кераклигини айтган. Шукурки, иккимиз ҳам омон қолганмиз. Шу сабабли, курашишни туғилишим биланоқ бошлаганман" - деди Антони.

Бразилиялик футболчи мем ва танқидларга қарамай жорий мавсумда "Бетис" сафида ёрқин ўйин намойиш қилмоқда. Ҳозирда у испан клуби сафида жами 20 та учрашувда майдонга тушиб 7 та гол ҳамда 5 та ассистни ўз номига ёздириб қўйган.