АПЛ клублари қайси футболчиларни кузатяпти?

“Ливерпуль” жорий мавсумда АПЛда энг яхши жамоа бўлиб турибди. Олтин медални беришга ҳали эртадир, чунки январь ойи кўп нарсаларни ўзгартириб юбориши мумкин. 

Жамоалар трансфер ойнасида фаол қатнашиб яхши футболчиларни сафига қўшиб олишни мақсад қилишмоқда. Қишки трансферларда қайси жамоа қайси футболчиларга қизиқиш билдириши, албатта эътиборга молик. Масалан, трансфер тақиқи олиб ташланган “Челси” трансфер ойнасида қандай ҳаракат қилиши.

“Тоттенхем”

Кристиан Эриксен – қишда жамоани тарк этмоқчи бўлган асосий футболчилардан бири. Албатта унга харидор жамоалар ҳам бор.

Шу сабабдан “шпорлар” унинг ўрнини босадиган ярим ҳимоячи излашмоқда. Хабарларга қараганда “Аякс” сафида тўп сураётган Хаким Зиеш асосий нишон бўлиб турибди. Бу борада лондонликларга “Бавария” қаршилик қилиши мумкин. Германия клуби ҳам Хакимни жамоага олиб келишга жиддий бел боғлаган. “Тоттенхем” ҳам унинг трансфери борасида ҳаракатларни бошламоқчи.

Битта муаммо – нархнинг қимматлиги. Ҳаттоки, бир мавсум олдин ҳам футболчини 26 млн фунтга олиш мумкин эди. Аммо ҳозир унинг нархи кескин равишда қимматлашган.

Бошқа номзодлар – “Селта”дан Браис Мендес ва “Лейпциг” ҳимоячиси Дайо Упамекано. Мендесни арзонроққа олиш мумкин, аммо Упамеканога 50 млндан кам сўрашмаслиги аниқ. “Шпорлар” бу борада таваккал қиладиларми?

“Манчестер Юнайтед”

Сульшер январ ойида трансфер қилишга мажбур. Жамоа қизиқишлар доирасида Деклан Райс ва Джейдон Санчолар бор. Аммо улар мавсум ўртасида жамоасини алмаштириши қийинроқ.

Иккала футболчининг нархи 150 млн фунтга бориши мумкинлиги айтилмоқда. “МЮ” қишда бунча сумма ишлатмаслиги аниқроқ. Аммо ҳаракат қилиши ҳам мумкин. Яна бир номзод – бу Марио Манжукич. Златаннинг ҳам қайтишини тахмин қилишмоқда баъзи нашрлар.

“Зальцбург”нинг 19 ёшли футболчиси эрлинг Холанд ҳам “Қизил иблислар” харид қилмоқчи бўлган футболчилар рўйхатида бор. Балки “Лион”дан Мусса Дембеле олиб келинар. Лекин Сульшер январ ойида юриш қилиши аниқ.

“Арсенал”

72 млнга Николя Пепе олиб келинганидан сўнг, “канонирлар”дан ҳамма нарсани кутиш мумкинлигини билиб олдик. Ўзи охирги пайтларда лондонликлар трансферлар ойнасида тушунарсиз ҳаракатлари билан ёдда қолмоқда.

Упамеканога “Арсенал” ҳам қизиқиш билдирмоқда. Яна бир ҳимоячи Мерих Демирал (“Ювентус”) ҳам қишда Англияга келиб қўшилиши мумкин. Туринда у заҳира ўриндиғида қолиб кетмоқда ва катта эҳтимол билан “Арсенал” сафига келиб қўшилиши мумкин.

“Манчестер Сити”

Ляпортнинг жароҳат олиши, турнир етакчисидан 14 очко ортда қолиши “шаҳарликлар” ҳимоя чизиғига янги футболчи олиб келиш ҳақида бош қотириши кераклигини билдирди.

Ўтган мавсумда шайхлар Гарри Магуайрни харид қилишдан бош тортишган эди. Улар футболчини жуда қиммат дейишганди. Ҳозирда “Бенфика”даги Рубен Диаш диққат марказда бўлиб турибди. Балки Ляпорт тузалгунга қадар футболчини ижарага олиши ҳам мумкин.

Лерой Сане эса “Бавария”га ўтиб кетиши мумкин. Шунинг учун унинг ўрнига янги футболчи харид қилиш керак. Номзодлар, Микел Оярсабал (“Реал Сосьедад”) ва Бен Чилвелл (“Лестер”) лар бўлиб туришибди. Чилвелл трансферини ёзда амалга оширишмоқчи эди. Аммо ўхшамаганди. Энди қишда яна бир ҳаракат қилиб кўришади.

“Лестер”

Жонни Эванс ва Чаглар Сёнджю дуэти яхши ўйнаётган бўлса-да, Рожерс ҳимоя чизиғига янги футболчи харид қилиш ҳақида бош қотиряпти.

“Борнмут”дан Натан Аке ва “Бёрнли”дан Жеймс Тарковски асосий нишондаги футболчилар ҳисобланади. Скаутлар бошқа лигадаги футболчиларни ҳам кузатишмоқда.

Ихеаначони ижарага беришмоқчи ва унинг ўрнига бошқа ҳужумчини харид қилиши мумкин. “Рейнжерс” ҳужумчиси Альфредо Морелоса “тулкилар”нинг нишонида турибди. Футболчи 26 ўйинда 22 та гол урган.

“Ливерпуль”

Ёз ойида “Ливерпуль” мухлисларни янги харидлар билан хурсанд қилмади. Клопп жамоага мос келадиган футболчи топа олмагани ҳақида айтди ва шу таркибда мавсумни бошлади. Қишда ҳам сенсация юз бериш эҳтимоли камроқ. “Ред Булл”дан Минамино сотиб олинди. Лекин футболчи жуда шов-шувли трансфер бўладиган нархга олинмади. “Ливерпул” Минамино учун 7.25 млн фунт тўлади.

Клопп ҳужумчиларга қизиқяпти. “Лейпциг”даги Тимо Вернер яхши вариант. Балки “Борнмут”дан Раян Фрейзер олиб келинар. Аммо раҳбарият ҳеч қандай футболчи вариантлари кўриб чиқилмаётгани ҳақида қайта-қайта айтишмоқда.