АПЛ. Ниҳоят, "Манчестер Юнайтед" ўзининг 3 та ўйинлик ғалабасиз серияга якун ясади

"Олд Траффорд" стадионида кечган учрашув мезбонларнинг 3:1 ҳисобидаги ишончли ғалабаси билан ниҳоясига етди. 17-дақиқада Андреас Перейра ҳисобни очди. Орадан икки дақиқа ўтиб Дэви Проппер ўз дарвозасини ишғол қилиб қўйди.

64-дақиқада Люис Данк бурчак тўпидан сўнг боши билан тўпни рақиб дарвозасига жойлаб қўйган ҳолда ҳисобни қисқартирди. Бироқ 66-дақиқада Маркус Рэшфорд таблодаги ҳисобни 3:1 кўринишга келтиришга эришди.

Шу тариқа, манчестерликлар 3 та ўйиндан иборат ғалабасиз сериясига якун ясади. Бугунги муваффақият натижасида "қизил иблислар" ҳисобидаги очколар сони 16 тага етди ва жамоа турнир жадвалида 7-ўринга кўтарилиб олди. 15 очкоси бор "Брайтон" эса 11-поғонани эгаллаб турибди.