АПЛнинг 2 та гранд клуби Бундеслиганинг тўпурарларидан бирини талашмоқда

Франкфуртнинг "Айнтрахт" жамоаси ҳужумчиси Уго Экитике Англия Премьер-лигасининг икки гиганти — "Ливерпуль" ва "Челси" эътиборини тортган. Журналист Бен Жейкобснинг маълумотига кўра, француз футболчисини олиш бўйича курашда ҳозирча Англия чемпиони — "Ливерпуль" пешқадамлик қилмоқда.

Аввалроқ "аристократлар" трансферга яқинроқ экани хабар қилинган эди, бироқ вазият ўзгарган. Мерсесайдликлар фаоллашиб, рақибларидан илгарилаб кетган. Аммо асосий тўсиқ — футболчи учун сўралаётган маблағ. "Айнтрахт" Экитике учун аниқ 100 миллион евро талаб қилмоқда, бу сумма ҳозирча ҳар икки клуб учун ҳам ортиқча ҳисобланмоқда.

Эслатиб ўтамиз, "Ливерпуль" яқинда Бундеслигадан рекорд даражадаги трансферни амалга оширди — клуб таркибига Флориан Вирц 150 миллион еврога қўшилмоқда. Экитике эса жамоанинг ёздаги навбатдаги қиммат харидига айланиши мумкин.