АҚШнинг машҳур клуби Ўзбекистон терма жамоасига мурожаат қилди!
Ўзбекистон миллий терма жамоаси ўз тарихида илк маротаба жаҳон чемпионатида иштирок этишга тайёргарлик кўрмоқда. Айни пайтда Фабио Каннаваро қўл остида бўлажак мусобақага тайёргарлик кўраётган бош жамоамиз мундиалдаги иштирокини Мексикада бошласа-да, учрашувларга АҚШда ҳозирлик кўради.
Миллий терма жамоамиз футболчилари АҚШ майдонларида бўлиб ўтадиган учрашувларга Атланта шаҳрида тайёргарлик кўради. Ушбу шаҳар шарафини ҳимоя қилувчи “Атланта Юнайтед” клуби ўз базасини ўзбек футболчиларига 10 июндан бошлаб тақдим қилади.
Ана шу муносабат билан АҚШнинг машҳур клуби ижтимоий тармоқ орқали Ўзбекистон миллий терма жамоасига мурожаат қилди.
“ Хуш келибсан, Ўзбекистон” “Атланта Юнайтед” машғулот маркази чоршанба, 10 июндан бошлаб, бутун турнир давомида миллий терма жамоанинг расмий базасига айланади, - дейилади Америка клуби баёнотида.
2026 йилги Жаҳон чемпионатида Ўзбекистон миллий терма жамоаси “K” гуруҳида Португалия, Колумбия ва Конго Демократик Республика футболчилари билан бирга кураш олиб боради.
Ўзбекистон жамоаси ўзининг илк ўйинини 18 июнь куни Мехикодаги жаҳонга машҳур “Ацтека” стадионида Колумбия футболчиларига қарши ўтказади. 23 июнь куни футболчилари Хьюстонда Португалия билан ўйнайди. Айнан мана шу тўқнашув кўплаб мухлису мутахассисларни қизиқтириб турибди.
Гуруҳдаги охирги ўйин 27 июнь куни Атланта шаҳридаги аренада Конго Демократик Республикаси терма жамоасига қарши ўтказилади.
Маълумот ўрнида айтиш лозимки, “Атланта Юнайтед” 2024 йилнинг ёзида Ўзбекистон миллий терма жамоаси сардори ва энг зўр тўпурари Элдор Шомуродовни ўз таркибига таклиф қилган эди.
Ўшанда Элдор Шомуродов “Кальяри” ижарасидан “Рома”га қайтган эди. Трансфер амалга ошишига ҳужжатларни расмийлаштириш жараёни кечиккани тўсқинлик қилган.
Фикрлар