“Бака-бака банг, дор ўйнанг”! Мундиалда Ўзбекистонга кимлар мухлислик қилишини биласизми?
Россиялик таниқли шарҳловчи Дмитрий Губерниев “Спорт Экспресс” нашрига берган интервьюсида футбол бўйича 2026 йилги жаҳон чемпионатида қайси терма жамоаларга мухлислик қилишини айтиб берди.
- Мен жаҳон чемпионатида ўзимизнинг терма жамоа қатнашганида уларша мухлислик қиламан. Ҳозир эса турнир давомида кимга мухлислик қилишимни ҳал қилиб олишим керак.
Ва бу, катта эҳтимол билан, Бразилия терма жамоаси бўлмайди, ҳатто мен футболчи сифатида ҳурмат қиладиган Дуглас Сантос уларда ўйнашига қарамасдан ҳам шу қарорга келдим.
Ахир Ўзбекистон жаҳон чемпионатига чиқди-ку – мен уларга мухлислик қиламан.
“Ялла” гуруҳи ва Наталья Нурмуҳамедова ижрочисида ўлмас қўшиқда айтилганидек, “Бака-бака-банг, дор ўйнанг, если упадешь – не плачь, а встань”. Бу мен учун ҳам муҳим ҳаётий шиорлардан бири.
Шунинг учун мен Ўзбекистонга мухлислик қиламан”, - деди Дмитрий Губерниев “Спорт Экспресс” нашрига берган интервьюсида.
Таъкидлаш жоизки, айни пайтда жаҳон чемпионати олдидан ташкиллаштирилган муҳим ўқув-машғулот йиғинига бош мураббий Фабио Каннаваро томонидан жалб қилинган Ўзбекистон миллий терма жамоаси футболчилари орасида Россия клубларида ўйнаб, бу мамлакат спорт жамоатчилигига яхши таниш бўлган чарм тўп усталари бор.
Хусусан, Элдор Шомуродов “Ростов”да, Аббосбек Файзуллаев ЦСКАда, Остон Ўрунов “Спартак Москва”, “Уфа” ва “Урал”да, Иброҳимхалил Йўлдошев ва Русланбек Жиянов “Нижний Новгород”да, Шерзод Эсонов “Акрон”да, Алишер Одилов “Химки”да, Жасур Жалолиддинов “Локомотив Москва” ва “Тамбов”да, Ҳусайн Норчаев “Алания”да, Рустамжон Ашурматов ва Умарали Раҳмоналиев “Рубин”да фаолият юритган.
2026 йилги жаҳон чемпионатининг финал босқичи 11 июндан 19 июлга қадар АҚШ, Канада ва Мексика яшил майдонларида бўлиб ўтади.
Ўзбекистон миллий терма жамоаси қуръа натижаларига кўра “K” гуруҳидан ўрин олган ва плей-оффга чиқиш учун Португалия, Конго Демократик Республикаси ҳамда Колумбия футболчиларига қарши баҳс олиб боради.
Фикрлар