Arauho «Barselona»ni tark etishi mumkin

«Barselona» markaziy himoyachisi Ronald Arauho­ning jamoani tark etishi mumkinligi haqidagi mish-mishlar yana matbuot sarlavhalariga qaytdi.

Kataloniya klubida Pau Kubarsi, Jеrar Marti, Erik Garsiya kabi yosh himoyachilar asosiy futbolchilar sifatida ko‘rilayotgani aytilmoqda. Shuningdek, tajribali Andreas Kristensen yaqinda jamoa bilan yangi shartnoma imzoladi. Shu sharoitda aynan Arauho ortiqcha figuraga aylanib qolishi mumkin, chunki u zahirada o‘tirish rolini qabul qilmasligi ehtimoldan xoli emas.

Mundo Deportivo nashri yozganiga ko‘ra, agar urugvaylik futbolchi rahbariyatdan ketishga ruxsat so‘rasa, «Barselona» uning o‘rnini bosadigan yangi markaziy himoyachi izlashga kirishadi.

Ronald Arauho­ning amaldagi shartnomasi 2031 yil yozigacha mo‘ljallangan. Transfermarkt portali bahosiga ko‘ra, 27 yoshli himoyachining transfer qiymati 20 million yevro atrofida baholanmoqda.