"Арсенал" грандлар талашган футболчи билан музокаралар ўтказяпти

"Реал Сосьедад" ярим ҳимоячиси Мартин Зубименди Лондоннинг "Арсенал" клубига ўтиши мумкин. Бу ҳақда журналист Дэвид Орнштейн хабар берди.

Манбага кўра, "канонирлар" 25 ёшли ярим ҳимоячининг трансфери бўйича музокаралар олиб бормоқда. Бироқ, бу қишда амалга ошириладиган трансфер эмас, испаниялик футболчи жорий мавсум якунлангач "тўпчилар" сафига қўшилади.

2024/25 йилги мавсумда Зубименди барча турнирлар доирасида 22 та ўйинда майдонга тушиб, 1 та гол урди ва 2 та голли узатма амалга оширди. Аввалроқ, Мартинга "Реал Мадрид", "Ливерпуль" ва "Манчестер Сити" каби клублар қизиқаётгани ҳақида хабарлар тарқалган эди.

Ярим ҳимоячининг "Реал Сосьедад" билан шартномаси 2027-йилнинг ўрталаригача амал қилади. "Transfermarkt" мутахассислари испаниялик футболчини 60 миллион еврога баҳоламоқда.