“Arsenal” hech qachon bunaqa qimmat futbolchi sotmagan

“Arsenal” klubi o‘z tarixidagi rekord transferni amalga oshirishga harakat qilmoqda. “Kanonirlar” yarim himoyachisi Emil Smit-Rouni sotib yubormoqchi.

“Fulxem” 23 yoshli markaziy yarim himoyachi uchun 35 million funt (41,5 million evro)to‘lashga rozilik bergan. Transfer tez orada yakunlanishi kutilmoqda.

Agar bu oldi-berdi amalga oshsa, “Arsenal” tarixidagi eng katta chiqish transferi bo‘ladi. Bungacha “kanonirlar”ning eng katta sotuvi 2017 yilda “Liverpul”ga jo‘natilgan Aleks Oksleyd-Chemberlen bo‘lgan. Bu o‘yinchi uchun “qizillar” londonliklarga 38 million evro to‘lagan.

Emil Smit-Rou “Arsenal”ning eng iqtidorli tarbiyalanuvchilaridan hisoblanadi. Klub uni ikki marotaba “Leyptsig” va “Xaddersfild” klublariga ijaraga bergan edi. Rahbariyat bu futbolchidan endi butkul voz kechmoqchi.

Emil Smit-Rou “Arsenal”ning birinchi jamoasida jami 115 ta uchrashuvda ishtirok etib, 18 ta gol va 15 ta assist muallifi bo‘ldi.