“Арсенал”: Сен бошқа клубларда яна бир айланиб кел

Англиянинг амалдаги чемпиони “Арсенал” раҳбарияти истеъдодли футболчи  Итан Нванерини тўлиқ сотиб юборишни истамаяпти ва ўз вингерини ижарага бериш вариантини афзал кўрмоқда.

Нванери бу ёзда “Марсель”даги унчалик омадли бўлмаган ижарадан кейин “Арсенал”га қайтди. Ўтган якшанба куни “канонирлар”нинг “Манчестер Сити”га қарши Англия Суперкубоги баҳси учун қайдномасига ҳам киритилмади.

“Арсенал” раҳбарияти Нванери фаолиятининг шундай босқичида эканини яхши тушунади: 19 ёшли англияликка мунтазам ўйин амалиёти керак. Бироқ “канонирлар” таркибидаги юқори рақобат туфайли бу имкониятни таъминлаш қийин.

Шу билан бирга, “Арсенал” Нванерини юқори баҳолайди ва у билан бутунлай хайрлашишни истамайди. Шу сабаб клуб футболчини ижарага юбориш вариантини устувор деб билмоқда.

Бу борада Нванери Габриэл Жезус, Габриэл Мартинелли ва Фабиу Виейрадан фарқ қилади, ушбу уч футболчи доимий трансфер учун сотувга қўйилган.

BBC маълумотига кўра, Нванерига қизиқиш билдираётган клублар орасида “Фулхэм”, “Милан”, “Лейпциг” ва “Боруссия Дортмунд” бор.